MALAYBALAY CITY (PIA)—Gitunol bag-ohay lang sa mga implementers kon tigpatuman sa Local Government Support Fund–Support to Barangay Development Program (LGSF-SBDP) ang 59 ka mga baka ngadto sa 59 ka mga beneficiaries sa Canangaan, Cabanglasan, Bukidnon isip dugang hinabang gikan sa gobyerno alang sa ilang Cattle Multiplier Farm.
Ang barangay Canangaan usa sa mga hilit nga komunidad sa lungsod sa Cabanglasan nga gigahinan sa gobyerno ug dugang kapanginabuhi-an.
Ang mga beneficiaries nasakop sa Tagbacan-Tumbaga Farmers Association nga dunay 20 ka miyembro; Umayamnon-Catablaran Farmers Association nga naay 20 ka miyembro; ug ang Umayamnon-Saluringan Farmers Association nga dunay 19 usab ka miyembro.
Kabahin kini sa P4 million nga “Assistance to Farmers Project” nga gilangkuban sa corn production, livestock and poultry production, ug vegetable production.
Mahinumduman nga una nang nadawat sa nasangpit nga mga benepisyaryo niadtong milabay’ng bulan sa Disyembre ang nagkalain-laing farm inputs sama sa 59 ka sako sa hybrid corn seeds; 354 ka sako nga organic fertilizer; 59 ka galon nga herbicide; 472 packs sa assorted vegetable seeds; ug 59 ka mga knapsack sprayer.
Gilauman nga sa dili madugay, matunol na usab sa ila ang 80 heads sa kanding, pito ka kabayo, 188 ka sako nga Phosphate fertilizer ug 59 ka sako nga Urea.
Gipasabot ni Engr. Carmelo Enrique B. Libot, provincial director sa DILG-Bukidnon nga ang maong kalampusan usa ka pagpamatuod nga ang tibuok gobyerno, gikan sa national, provincial, municipal ug barangay government, nagkahiusa aron tabangan ang mga naapektuhan sa armadong pakigbisog, pinasikad sa Executive Order No. 70 kon whole-of-nation approach ni President Rodrigo Duterte diin naka-angkla ang National Task Force to End Local Communist Armed Conflict kon NTF-ELCAC.
Isip natahasan sa pagpatuman sa nasangpit nga proyekto sa kagamhanan, gipanghinaut ni provincial agriculturist Engr. Alson G. Quimba nga ampingan ug palambo-on ang programa uban sa pagdasig nga paningkamotan nga mapabilin ang ilang panaghi-usa alang sa malinawon nga pagpanginabuhi uban sa ilang pamilya.
Ang Barangay Canangaan, Cabanglasan dunay kinatibuk-ang P20 million nga pundo gikan sa LGSF-SBDP sa tuig 2021 nga nakatagana alang sa ‘agri-infra component projects’, ‘infrastructure projects’ ug ang natumbok nga ‘assistance to farmers projects’. (PAIA-PGB/PIA-10/Bukidnon)
