CAMIGUIN (PIA)--Ang Department of Science and Technology (DOST)-10, pinaagi sa Camiguin Provincial Science and Technology Center, mihatag og P1,082,589.40 sa Catarman aron sa pagpausbaw sa estado sa nutrisyon sa mga kabatan-onan sa 14 barangay sa maong munisipyo, Hulyo 28.

Ang ceremonial turnover gipahigayon sa 48th Nutrition Month Culmination sa Lokal nga Pangagamhanan sa Catarman diin gidawat mismo ni Mayor Kiterio Antonio U. Palarca II ug Eleonor D. Butaya, municipal nutrition action officer designate, ang maong tabang sa DOST.

Tuyo sa maong kantidad ang paghatag og 'rice mongo based complementary foods' ug Enhanced-Nutribun nga gibuhat sa DOST-Food and Nutrition Research Institute (FNRI) aron mapakunhod ang malnutrisyon sa munisipyo.

Ang maong complementary foods iapud-apod sa 14 ka barangay sa Catarman nga naglangkob sa Bonbon, Catibac, Lawigan, Bura, Panghiawan, Mainit, Compol, Liloan, Poblacion, Sto. Niño, Looc, Manduao, Alga, ug Tangaro.

Mukabat sa 326 nga kabatan-onan nag-edad 48-72 months ang makabenepisyo sa maong proyekto. Sa maong ihap, 162 ang mga lalaki ug 164 ang babae. Ang maong proyekto ipatuman pinaagi sa pag-apud-apod sa Rice Mongo Curls sulod sa 120 ka adlaw ug supplementation sa E-nutribun sa mga nasutang kabatan-onan sa Catarman aron mapausbaw ang panglawas sa 50% nga target nga mga kabatan-onan.

Pinaagi sa maong interbensyon, tumong sa DOST-10 nga makahatag og masustansya pero barato nga pagkaon sa komunidad, ug mapahibalo usab ang mga ginikanan sa kaimportante sa maayong nutrisyon.

Nagpasalamat sa DOST-10 si Palarca ug giingon nga dako ang ilang kalipay sa mga paningkamot sa DOST sugod pa sa pagpatuman sa CEST sa Catarman. (DOST/PIA-10/Camiguin)