MATI CITY, Davao Oriental-- Duna nay speed limit na ipatuman sulod sa Dakbayan sa Mati human mapirmahan na ni Mayor Michelle Nakpil Rabat ang Executive Order No. 69 series of 2022 kon “Setting the speed limits for all kinds of motor vehicles within the territorial jurisdiction of the City of Mati, providing for its sanctions, and other purposes”.

Sulod sa maong orden de ehekutibo ang speed limit na dapat tumanon sa tanang matang sa sakyanan nga magdagan dinhi sulod sa syudad sa Mati.

Kinahanglang dili mulapas sa 60km/hr ang dagan gikan sa Clergy House, Madang hangtod Crossing Red Cross, Barangay Matiao (Diversion Road). Ingon man gikan NHA Intersection padulong Barangay Bobon ug Barangay Tam-isan.

Samtang 40 kph ang ipatuman Gikan sa intersection duol sa St. Camillus Hospital padulong Madang hangtod Rotonda sa Barangay Dahican. Ingon man gikan Crossing Martinez Subdivision padulong Sambuokan Village.

Samtang 30 kph ang maximum kung muagi sa Crossing Lemente Village hangtod Nazareno. Ingon man sa Quezon Street gikan IHMA hangtod tulay sa may Liberty Masjid ug sa Bonifacio Street sa may Shell hangtod Crossing Mapantad.

Dili hinuon kinahanglang mabalaka ang mga motorista tungod magbutang og speed limit signs sa tanang kadalanan.

Magpahigayon usab ang City Traffic Management Office (CTMO) ug Information, Education and Communication (IEC) campaigns ngadto sa katawhan.

Sa mga dili motuman sa speed limits, pwedeng dakpon, i-impound ang sakyanan ug pabayaron subay sa Republic Act 4136 kon “Land Transportation and Traffic Code” ug Municipal Ordinance No. 75 series of 2002 kon “Traffic Ordinance of the City of Mati, Province of Davao Oriental”. (CIO MATI/Ethel Gastanes)