CAMIGUIN (PIA)--Gikan sa pagbisita ug manwal nga pag-ihap, nakatala ang Department of Education (DepEd) Camiguin Provincial Office og 25,006 nga mga magtutungha gikan sa 66 pampubliko ug 13 pribadong tunghaan sa probinsya alang sa SY 2022-2023, Agosto 22.   

"Katuwang ang lokal na pamahalaan, PNP [Philippine National Police] sa traffic management, Parents Teachers Association (PTA), at mga Barangay Health Emergency Response Teams (BHERTs), maayos ang naging pagtanggap sa mga mag-aaral ng bawat paaralan," ingon ni Schools Division Superintendent (SDS) Edgardo Abanil.

(Kauban ang lokal nga pangagamhanan, PNP sa traffic management, Parents Teachers Association (PTA), ug Barangay Health Emergency Response Teams (BHERTs), hapsay ang pagdumala sa mga estudyante sa matag tunghaan)

Gidugang ni Abanil nga ilang gisiguro nga luwas ang mga estudyante sa ilang pag-eskwela pinaagi sa istriktong pagpatuman sa minimum public health standards lakip na usab ang pagbutang sa mga hugasanan sa kamot sa mga tunhaan.

Kauban ni Abanil si ASDS Sunny Ray Amit sa pagbisita sa mga tunghaan dili lamang sa pag-ihap sa mga estudyante pero lakip na ang paghatag og teknikal nga suporta sa mga magtutudlo.

Aron maawhag ang mga estudyante sa pagtuon, nag-andam ang mga tunghaan og lain-laing gimik samtang ang uban nanghatag og libreng gamit pang-eskwela.

Alang sa mga isyu o concerns, giawhag sa DepEd Camiguin ang mga ginikanan o kauban sa magtutungha nga mukontak o tawag sa 0999 999 8623 or 0999 999 8238. (RTP/PIA-10)