MAMBAJAO, Camiguin (PIA)--Ang Department of the Interior and Local Government (DILG) Camiguin Provincial Office gitabangan ang Lokal nga Pangagamhanan sa Camiguin sa pag-andam sa mga dokumento ug rekisitos alang sa Seal of Good Local Governance (SGLG) National Calibration.
Si DILG Camiguin Provincial Director Rhona Pedraza-Abadilla ug Cluster-head Jay Niel C. Anasco gipasabot ang mga pamaagi sa SGLG, checklists, ug uban pang kinahanglan alang sa pagpamatuod ngadto sa mga department heads ug focal persons sa gipahigayong PLGU-initiated coordinative nga miting, Agosto 22.
Ang DILG Camiguin gipahinumduman usab ang mga department heads ug focal persons nga mag-andam usab sa ipahigayong interbyu sa mga national validators.
Gipadayag ni Abadilla ang iyang suporta sa lokal nga pangagamhanan sa paningkamot niini nga makakuha sa SGLG award, labi na sa umaabot nga national calibration karong Setyembre 6.
Ang SGLG usa ka incentive system nga nag-awhag sa mga LGUs nga padayong ipausbaw ang ilang pagtrabaho lakip na usab sa ubang aspeto sa pagdumala. (DILG-10/PIA-10/Camiguin)
