Malipayong nakadawat ang 601 ka mga Persons with Disabilities (PWD) sa ayudang pinansyal pinaagi sa programa sa temang Buhay-nihan: Buhay at Bayanihan para sa Mamamayan niadtong Disyembre 3, 2022 sa covered court sa Barangay Linabo.
Anaa sa 2,109,510 pesos ang giapod-apod sa mga PWDs gikan sa 49 ka mga barangay sa Dapitan diin matag-usa kanila ang nakadawat sa 3,510 pesos.
Sa mensahe ni Mayor Seth Frederick Jalosjos nga gipabati ni Darry Patilano, gikalipay og dako sa mayor ang paghatag og ayudang pinansyal sa mga PWDs aron makatabang diha sa ilang adlaw-adlaw nga mga panginahanglanon.
Mapasalamaton sab si Mayor Jalosjos sa mga tawong nagpaluyo niini labina kay Presidente Bongbong Marcos, DSWD Secretary Erwin Tulfo ug CSWD officer Marilyn Sy.
Ang inahang si Hermida Bandejon nga taga-Barangay Talisay kinsang anak nga si Hazel usa ka PWD ang mapasalamaton kay Mayor Jalosjos kay usa ang iyang anak sa mga nahatagan sa pinansyal nga ayuda.
Ang Cash For Work (CFW) alang sa mga PWDs gipatuman ubos sa operasyon sa Kapit-bisig Laban sa Kahirapan: Comprehensive and Integrated Delivery of Social Services (KALAHI-CIDSS)—nga usa sa mga programa sa DSWD aron mapaabot ang insaktong serbisyo, mapakunhod ang insidente sa kapobrehon ug makab-ot ang maayong panggobyerno sa nasud.
Nanguna sila Regional Procurement Officer Eliseo Morido, Project Evaluation Officer Maridith B. Jul kauban ang mga empleyado sa buhatan sa CSWD sa gihimong pagpanghatag sa pinansyal nga ayuda.(Liezel Lalangan and Hashel Recamara, Photo by Mark G. Potot | Dapitan City Information Division)
