Ang One Planet City Challenge maoy usa ka mahigala-ong indigay sa tibuok kalibotan nga gilusad sa WWF aron sa pag-ila sa mga dakbayan alang sa ilang gihimong mga lakang ug paglantaw kon kini ang nahasubay pa sa mga katuyu-an nga gitakda dinha sa Paris Agreement dinha sa pagkunhod sa climate change.

Dinha sa OPCC, ang mga dakbayan ang gidasig sa pagpadayag sa ilang mga Best Practices ug mga plano nga makatabang sa pagpakunhod sa  epekto sa climate change ug sa pagmugna og kausaban kalabot niini. Ang mga nahimong finalists niini ang gi-ebalwar sa International Jury Panel  kansang mga miyembro maoy nga eksperto dinha sa natad sa urban sustainability dinhi sa tibuok kalibotan.

Sumala pa nga ang dakbayan sa Dipolog ang milamang sa laing duha ka mga finalists nga mao ang dakbayan sa Quezon ug Davao, uban sa laing 13 ka mga kwalipikadong dakbayan dinhi sa nasud.

Kahibalo-an nga ang “We Love Cities” maoy usa ka kampanya nga nagtugot sa mga katawhan sa tibuok kalibotan nga makapadayag sa ilang suporta alang sa malahutayong urban development pinaagi sa pagboto alang sa “most  lovable  city” gikan sa WWFs One Planet City Challenge finalists ug sa paghatag og mga suhestiyon alang sa dugang kalamboan sa mga dakbayan.

Kining nasangpit nga kampanya ang nagtumong sa pagpa-usbaw sa pagpakabana alang sa malungtarong paglambo sa mga dakbayan, paghatag sa publiko sa kahigayonan sa pagsaulog, pagboto ug pagpa-usbaw sa ilang mga dakbayan pinaagi sa paghimo og mga suhestiyon ngadto sa  mga magbabalaod, ug sa paghatag og pasidungog sa mga dapit ingon man sa pagpalig-on sa  panagdugtong tali sa publiko ug mga  lideres. (CIO-afb)