MAMBAJAO, Camiguin (PIA)--Ang Department of Science and Technology (DOST) sa Camiguin naghatag og 50 ka multi-purpose solar dryer (portasol) sa probinsyal nga pangagamhanan pinaagi ni Gob. Xavier Jesus D. Romualdo.
Ang mga portasol units ihatag ngadto sa 38 nga lokal nga mga mag-uuma, food processors, ug kaabag nga mga tunghaan sa probinsya.
Sa maong portasol, ang maong sektor mamahimo nang magpauga sa ilang mga ani ug lain pang mga produkto sama sa isda, nukos, prutas, ug uban pa sa mas sayon ug paspas nga pamaagi. Ang maong mga produkto pwede gihapong ipauga maski pa dag-um ang panahon.
Gamit ang portasol, masiguro nga ang mga produkto luwas, limpyo, ug maayo ang kalidad samtang ubos lang gihapon ang gastuon sa produksyon.
Ang mga trays gama sa aluminum, diin maayo kini nga konduktor sa kainit nga importante sa pagpauga og mga ani. Sa maong portasol, makab-ot ang mas paspas nga 50-75% nga pagpauga. Ang usa ka portasol aduna'y 12 nga tray nga makakarga og pinakamenos nga ¼ cavan o 12–13 ka kilo sa palay, isda, ug mga prutas kada tray.
Sa naandan, ang mga mag-uuma ug food processors gapauga sa ilang mga produkto sa mga dalan o sementadong lugar, ug kini makaingon sa pagkaalkansi sa ilang pangita ug pagkahugaw sa produkto.
Isip tubag niini, si Francisco Pagayon, imbentor nga Pilipino ug sakop sa Filipino Inventors Society Inc., giimbento ang portasol, usa ka multipurpose solar dryer nga pwedeng mapatong-patong, limpyo, ug gidisenyo aron maubos ang umog sa daghang mga produkto o ani.
Ang maong proyekto gipatuman ubos sa Community Empowerment through Science and Technology (CEST) program sa DOST nga aduna'y pondo nga P1.825 million. (DOST-Camiguin/PIA-10/ Camiguin)
