TAGUM CITY, Davao del Norte- Andam mohatag si Governor Edwin “Kuya Gov’ Jubahib og P1 million nga reward alang sa impormanteng makatudlo sa lokasyon sa mga dagkong drug lord nga nagalihok dinhi sa probinsya sa Davao del Norte. Kini ang iyang pahayag atol sa pagsunog sa mga nakumpiskang ginadiling droga sa Wood Haven Crematorium, Brgy. La Filipina, Tagum City niadtong Nobyembre 26, 2022.

Dako ang pangandoy sa gobernador nga masumpo na ang problema sa ginadiling droga sa dili pa mahuman ang iyang termino. Sanglit, ubay-ubay na ang mga kabarangayan nga gideklarang drug cleared barangay, samtang adunay duha ka lungsod ang bag-ohay pa lamang gideklarang drug cleared municipality.

“Ako gyung hangyo sa tanan nga katawhan, ‘pag naa moy nahibaw-an diha nga nagagamit sa droga o nagnegosyo og droga nga mohatag mo’g report sa atong PNP, sa atong PDEA o NBI o any government agency, o diretso mo nga moreport sa akong opisina. Walay makahibalo sa inyong pagreport. Mohatag pa ko’g reward sa inyoha. Kung big time ang inyong report, P 1 million,” sulti ni Kuya Gov.

Giawhag ni Governor Jubahib ang mga katawhan nga nagagamit sa ginadiling droga sa paghunong na sa maong bisyo. Iyang gisaysay ang mga krimen nga posibleng mahimo sa mga kabataan samtang anaa ilawom sa ginadiling droga. Sama na lamang sa pagpanglugos sa mga menor de edad ug sa mga katigulangan kalakip sab ang pagpatay.

“Akong panawagan sa tanang nagagamit sa drugs ug nagnegosyo sa drugs. Unahon na nako ning nagamit. Undangon na ninyo ning paggamit sa drugs labi na ning shabu. Ngano man? Wala man gyuy kaayohan ihatag sa inyoha. Ug kamo pong mga negosyante aning droga, maluoy mo sa mahimong biktima aning droga. Ayaw na ninyo ipadayon. Daghan kaayong mahimong negosyo,” saysay sa gobernador.

Gipasalig niya, nga andam siyang motagana’g tabang alang sa mga biktima sa ginadiling droga, nga gusto na mabag-o ang dagan sa ilang kinabuhi. Iya kining librehon sa pagparehab kung ugaling man boluntaryo kining motahan sa ilang kaugalingon.

“Kung namroblema mo sa rehab, ang Davao del Norte, naa tay drug rehab center. Naa sa New Corella. Kung mo-volunteer mo’g surrender, nga moundang namo’g gamit sa droga unya magparehab mo, hala ipagamit nako tong rehab center nato sa New Corella. Librehon mo nako didto nga magparehab mo aron maulian mo sa inyohang pagamit sa droga,” ingon ni Kuya Gov.

Aron mas pakusgan pa ang kampanya batok ginadiling droga, gipahigayon ang Provincial Anti-Drug Abuse Council (PADAC) 4th Quarter Regular Meeting sa DavNor Capitol Pavilion, Mankilam, Tagum City, niadtong Nobyembre 28, 2022 nga gipangunahan ni Provincial Social Welfare and Development Office Head Rosalinda Rapista, ang head sab sa PADAC Secretariat.

(Writer: Nestor Mata, Jr.-PICKMO)