VALENCIA CITY, Bukidnon (PIA)--Gilunsad sa Department of the Interior and Local Government (DILG) ug Valencia City local government niadtong Pebrero 6 ang Seal of Good Local Governance for Barangays kon SGLGB.

Mahimong maangkon sa barangay ang maong award kung mapasar niini ang mga Core Areas nga mao ang Safety, Peace and Order, Financial Administration and Sustainability, ug Disaster Preparedness, lakip ang usa sa Essential Areas nga mao ang Social Protection and Sensitivity, Business-friendliness and Competitiveness, ug Environmental Management.

Sumala ni City Vice Mayor Atty. Ted Pepito, ang SGLGB usa ka mahinungdanon nga programa, sanglit para kaniya, ang kalamposan sa maayong performance sa mga barangay, kalamposan usab sa syudad.

Ang SGLGB usa ka Recognition-based program ug progresibong sistema sa pag-evaluate sa performance sa pagdumala sa mga kabarangayan sa syudad.

Dili usab bag-o sa maong pag-evaluate ang mga barangay sa dakbayan tungod kay nakaagi na kini sa kaniadto nga programa sa Galing Barangay Awards kon GABAY.

Nahimong basehan sa pagpatuman sa SGLGB dinhi sa dakbayan ang DILG Memorandum Circular No. 2021-074 ug ang City Ordinance No. 07-2022 o ang Ordinansa nga nag-institutionalize sa SGLGB sa dakbayan nga gipangunahan ni City Councilor Rolando Centillas ug co-authored ni Councilor Annalou Zambrano.

Kamulo pa usab ang syudad sa pagpangandam ug paghan-ay sa schedule alang sa pagpahigayon sa SGLGB evaluation karon nga tuig.

Pinaagi sa maong programa, malaumon si Mayor Azucena Huervas nga maningkamot ang mga kabarangayan nga kanunay makiglambigit sa maayong pagdumala ug pagpangalagad alang sa kalambo-an sa katawhan. (Valencia LGU/BGEpan/PIA-10/Bukidnon)