CAGAYAN DE ORO—Ang Department of Tourism (DOT)-10, sa pakigtambayayong sa Department of Labor and Employment (DOLE)-10, nakatigom og kinatibuk-ang 746 ka mga aplikante atol sa duha ka adlaw nga pagpahigayon sa 'Trabaho, Turismo , Asenso!' Philippine Tourism Job Fair Northern Mindanao leg gikan Marso 30 hangtod 31, 2023, sa Limketkai Mall Atrium sa Cagayan de Oro.
Ang DOT-10 ug DOLE-10 nakadawat og 528 ka rehistrasyon sa unang adlaw ug 218 sa ikaduha, diin 55 ang natala nga Hired-On-The-Spots (HOTS) ug 112 ang near-hired o kadtong kuwalipikado apan gikinahanglan gihapon nga mupasa og mga katapusang rekisito sa kompanya.
Sa 55 ka HOTS, ang uban mibiyahe pa gikan sa Misamis Occidental, Bukidnon, Lanao del Norte, ug Gingoog City aron makatrabaho.
Ubay-ubay nga mga malaumon nga nahimong instantly-hired nga mga empleyado ang mipaambit sa makapadasig nila nga mga istorya sa job fair, usa niini si Juliet Castillo, biyuda nga taga-Gingoog City ug kanhi domestic helper sa Saudi Arabia. Human madawat on the spot sa Kaamulan Multi-Purpose Cooperative, siya mihilak sa kalipay. Ang unang adlaw sa job fair wala makagarantiya kaniya og posisyon, apan wala kana makapugong kaniya sa pagbalik pagkasunod adlaw, diin nakakuha siya og trabaho ug ginganlan nga unang HOTS sa maong adlaw.
Ang mga buhatan nakatigom ug 77 ka lokal nga mga establisemento nga nagtanyag og 2,528 ka bakanteng trabaho sa lain-laing mga posisyon, diin ang mosunod mao ang nag-unang lima ka pinaka-in-demand: financial advisors (500), customer service representatives (240), production crew (100), sales staff (62), ug utility (48).
Si DOLE-10 Assistant Regional Director Estrella Pahalla namahayag nga ang job fair tukma sa panahon alang sa mga displaced, jobless, ug underemployed nga mga kandidato, partikular na sa industriya sa turismo sa rehiyon.
Si DOT-10 Regional Director Marie Elaine Unchuan mipadayag usab sa iyang pasalamat sa tanang nalambigit sa paghimo sa Northern Mindanao leg job fair nga usa ka dakong kalampusan, ilabi na nga kining kalihukan isa sa mga lakang ngadtu sa pagpalagsik sa industriya sa turismo.
“With the great support of our partner DOLE, our LGUs, our employers, our partner agencies, and the huge positive response of this job fair, we know that we are on the right track to full recovery and towards a more vibrant and more robust tourism industry,” matud pa ni Unchuan. (DOT-10/PIA-10)
