May 19, 2023 - Nangandam na ang kagamhanang lokal sa Dipolog alang na umaabot nga El Niῆo nga nasayrang mohapak sa mga bulan sa Hunyo, Hulyo, Agosto og posible pang moabot sa sayong bahin sa tuig 2024.
Ang City Disaster Risk Reduction and Management Council (CDDRMC) ning dakbayan ilawom sa pagpangulo ni Mayor Darel Dexter T. Uy, ang mipahigayon og tigum kaganinang buntag, Mayo 19 ning tuiga, diin gituki ang kasamtangang sitwasyon sa mga sektor sa agrikultura, maayong panglawas kon health, peace and order, insurgency, academe ug uban sektor nga pwedeng ma-apektahan sa el niῆo phenomenon.
Sa nasangpit nga tigum, mipadayag ang mga sektor nga nahisgutan sa unahan, sa status sumala usab sa ilang pre-assessment nga gihimo lakip na usab ang mga tukmang lakang nga pagahimuon aron matubag ang mga panginahanglanon sa panahon sa hulaw.
Natuki usab ang mga sakit nga kasagarang motakboy sa mga kabataan panahon sa ting-init samtang gituki usab sa PAGASA ang heat index dinhi sa dakbayan.
Si Mayor Uy ug Bise-Mayor Senen O. Angeles ang parehong mipadayag alang sa gikinahanglang mga pangandaman ning umaabot nga hulaw tungod kay kini mahimong makahatag og kalamidad ilabina sa agrikultura busa importante nga dunay “scheme” aron mahatag dayon ang emergency relief assistance alang niadtong ma-apektohan sa nasangpit nga kalamidad. (CIO-Ltd/jelyn)
