DAVAO DEL NORTE (PIA) --Gipasidunggan na sab si Davao del Norte Governor Edwin “Kuya Gov” Jubahib isip Governor of the Year sa gipahitabong Nation Builders and Mosliv Awards 2023 sa Okada Manila, Parañaque City niadtong Hunyo 30.

Usa si Kuya Gov sa duha ka gobernador sa Pilipinas nga nakakuha sa prestihiyosong pasidungog.

Matod sa Sustainability Standards, Inc., ang organisasyon nga nagdumala sa Nation Builders and Mosliv Awards, miagi sa hugot ug hingpit nga proseso ang pagpili sa mga gipasidunggan.

Kini basi sa ilang katakos isip lider, maayong ehemplo sa katilingban, ug dako nga gikatampo alang sa malungtarong kalamboan dili lamang sa ilang gipamunoan apan sa kinatibuk-ang nasud.

Atol sa Ulat ni Kuya Gov niadtong pagsaulog sa kasumaran sa Araw ng Davao del Norte niadtong Hulyo 1 sa DavNor Gymnasium, iyang gisaysay ang nahimo sa probinsyal nga panggamhanan ubos sa iyang administrasyon aron sa kaayohan sa mga dabaonon.

Matod pa sa Gobernador, ang tinuod nga mananaog mao ang katawhan nga naghatag niya og inspirasyon aron maningkamot ug buhaton ang tanan alang sa kalamboan.

Sama ni Kuya Gov, nakuha sab sa Davao del Norte ang Most Sustainable and Liveable Province Award. Kahinumduman nga una kini nilang nadawat sa milabay’ng tuig. (Provincial Information Communication and Knowledge Mgmt Office/Mervin Jay Suaybaguio/ JMDA)