NABUNTURAN, Davao de Oro (PIA) -- Ang kalay-on sa lugar dili babag mahatod lamang ang tinud-anay nga serbisyo sa gobyerno ngadto sa mga Geographically Isolated and Disadvantaged Areas (GIDA) sa probinsya sama nalang sa Barangay Panangan ug Gubatan sa Maco, human personal kining giadtoan ni Governor Dorothy Montejo Gonzaga kauban si Congressman Ruwel Peter Gonzaga ug uban pang mga opisyales kaniadtong Sept. 13, 2023.

Kapin 500 ka mga indibidwal ang naka benepisyo sa libreng tuli, ibot-ngipon, tambal, medical check-up, food packs, ug uban pa. Ming hatag usab og konsultasyon ang opisina sa Provincial Agriculturist’s Office, Provincial Veterinarian ug Provincial Environment and Natural Resources Office sa mga angay pang serbisyo nga gikinahanglan sa komunidad sa matang sa agrikultura.

Ming tambong usab si 1001st Brigadier General Felix Ronnie B. Babac, Mayor Arthur Carlos Voltaire Rimando, Board Member Ruwina Gonzaga, Albert Camana, mga kapulisan ug opisyales sa barangay.

Sa laing bahin, nakadawat usab ug food packs ang mga katawhan sa Barangay Lebanon, Montevista ug Barangay Andili sa Mawab.

Ang Serbisyo Caravan ug Kamustahan sa Barangay usa sa mga programa ubos sa administrasyon ni Governor Gonzaga aron mahinabi ang mga katawhan aron mahatagag katubagan ang mga mulo ug masustinar ang malahutayong kalinaw sa probinsya. (PR-Provincial Government of Davao de Oro/PIA)