January 5 – Mokabat ngadto sa kinatibuk-ang kapin sa kinse (15) milyones ka pesos nga balor sa mga proyektong inprastraktura ang gi-turn-over ngadto sa mga kabaranggayan ning siyudad sa Enero 5, 2024 sa kagamhanang lokal ning siyudad pinaagi na sa City Engineering Office.
Ang nasangpit nga mga proyekto ang gilangkoban sa mga Road Concreting ug pagtukod sa pipila ka mga pasilidad nga tuyong gihimo alang sa mga katawhang Dipolognon.
Nanguna sa maong kalihokan mao si City Mayor Darel Dexter T. Uy, uban nila ni City Engineer, Engr. Susan B. Ualat, uban na sa mga personahe gikan sa nahisgotang buhatan sa unahan.
Atol sa maong turn-over, mainiton usab kining gitambongan sa mga opisyales sa mga hingtungdang barangay, pinaagi sa pagpanguna usab sa mga Punong Barangay, uban na sa mga opisyales niini.
Sigun sa dugang nasayran, nga kining nasangpit nga mga proyekto ang tuyong gimugna, aron sa paghatag sa dugang kalamboan sa mga kabaranggayan dinhi palibot sa siyudad, nga gilantaw nga makatabang og dako sa mga katawhan.
Sumala pa, nga sukad sa paglingkod ni City Mayor Darel Dexter T. Uy isip Mayor ning atong dakbayan, wala’y hunong ang pagbubo sa mga nagkalain-laing proyekto dinha sa atong mga kabaranggayan, hangtud na ning kasamtangan.
Matud pa nga katuyu-an sa atong hepe ehekutibo nga ona siya mokanaug sa iyang katungdanan isip amahan ning atong pinalanggang dakbayan karong sunod tuig, sa 2025, makabilin kini og mga kaayohan alang sa atong katawhan, nga nakitang dugang makapalambo sa atong mga kabaranggayan, ug usab magsilbing legasiya sa iyang administrasyon, nga makatabang sa atong mga katawhan, ug mahimong dili mahikalimtan sa mga katawhang Dipolognon.(CIO-afb)
