Maraming salamat ating Secretary ng Human Settlements and Urban Development Department, Secretary Jerry Acuzar. [Please sit down.]

Ang dating ama ng Lungsod ng Valenzuela na ngayon ay Social Welfare and Development Secretary, Secretary Rex Gatchalian; nandito rin ang ating mga senador, si Senator JV Ejercito at saka ang inyong favorite son, Senator Sherwin Gatchalian; the National Housing Authority General Manager Joeben Tai; at ngayon na nakaupo na nagseserbisyo pa rin mula sa pamilyang Gatchalian, our City Mayor Wes Gatchalian; at lahat ng ating mga bisita ngayong umagang ito, magandang tanghali na, magandang tanghali sa inyong lahat.

Lubos akong natutuwa na makasama kayo sa araw  na ito, upang pasinayaan ang proyektong  pabahay dito sa Barangay Arkong Bato sa Lungsod  ng Valenzuela.  

Itatayo natin sa lugar na ito ang ikaapat na Disiplina  Village na binubuo ng dalawampung (20) gusali  na magiging tirahan ng isang libo at dalawang  daang (1,200) pamilya na kasalukuyang  naninirahan sa Tullahan River at sa Manila Bay. 

Karugtong ito ng mga nauna ng Disiplina Village  na naitayo ng lokal na pamahalaan sa Barangay  Ugong, Bignay, at Lingunan sa Lungsod  ng Valenzuela. 

Ang pang-apat na Disiplina Village na ating  itatatag ay malapit sa mga paaralan, pagamutan,  at iba pang kapaki-pakinabang na mga pasilidad  para sa ating mga mamamayan. 

Hinihikayat ko ang lokal na pamahalaan ng Valenzuela  ang ating mga benepisyaryo ng Disiplina Village  na panatilihin ang kaayusan ng kanilang  mga bahay para din naman sa ikakaayos ng buong  pamayanan.  

Sa puntong ito, nais kong bigyang-pagkilala  ang buong lokal na pamahalaan ng Valenzuela. Alam naman po natin itong mga ganitong klaseng project, kung hindi masigasig at hindi ang maganda ang pag-uugnay sa national government at sa local government ay hindi po natin magagawa itong proyektong ito. Kaya’t kami sa national government ay nagpapasalamat sa LGU ng Lungsod ng Valenzuela [applause] sa kanilang napakalaking ginawa upang magkaroon tayo ng pabahay dito ‘yung pang-apat, Phase 4 na ito ng Disiplina Village.

At sa pangunguna sa pagbuo ng proyektong ito ay kung wala ang LGU hindi po natin magagawa at ito po ay nakasama na sa Build Better More housing program ng ating administrasyon. [applause]

Ang Valenzuela ay napakagandang halimbawa sa ating pagsisikap na makamit ang ating hangaring  mabigyan ng maayos na pabahay ang ating  mga mamamayan. 

Kaya naman, hinihimok ko kayong lahat  na ipagpatuloy ang pagtatayo ng de-kalidad  at abot-kayang pabahay upang kayo ay patuloy  na maging sandigan ng bawat Pilipino.  

Tiyakin natin na ang mga maninirahan dito  ay magkakaroon ng sapat na oportunidad upang  makapag-hanapbuhay at magkaroon  ng pagkakakitaan gamit ang kanilang mga talento  at kasanayan.  

Mahalagang makipagtulungan sa iba pang mga ahensya ng gobyerno at pribadong sektor  upang maisakatuparan ang ating mga kolektibong hangarin. 

Gayundin, tiyakin natin na ang ating  mga gusali ay matatag gamit ang kalidad  at matibay na mga materyales.  

Nagagalak ako sapagkat pinangunahan ninyo  ang pagpapatayo ng mga bahay para sa ating  mga pamilyang naninirahan sa delikadong lugar ngayon,  at mga lubos na naapektuhan ng mga proyekto  ng gobyerno. 

Tunay ngang sa pamamagitan ng ating pagkakaisa  at pagmamahal sa bayan, magbubunga ang ating  pagsusumikap na makapaghandog ng maayos,  matiwasay, at produktibong pamumuhay  para sa mga Pilipino. 

Bukod dito, manunumbalik din ang kanilang  pag-asa hindi lamang para sa kanilang mga sarili,  kundi pati rin sa kanilang mga anak  na sila din ay nangangarap ng magandang kinabukasan.

Sa ngayon, patuloy namang nagsisikap ang ating pamahalaan upang mas marami pa tayong  maipapatayo na mga pabahay para sa ating  mga minamahal na kababayan.

Patuloy nating pinag-aaralan kung paano  isasagawa ang pagtukoy at paggamit  sa mga bakanteng lupa ng gobyerno na maaaring  tayuan ng mga pabahay, ayon sa ating mga batas  at alituntunin.  

Bilang pangwakas, naniniwala ho ako na  makakamit natin ang lahat ng ating mga hangarin  para sa Pilipino at para sa bayan kung tayo  ay patuloy na magdadamayan  at magtutulungan. 

Kaya patuloy akong nananawagan ng pagkakaisa  upang sama-sama din nating matupad  ang pangarap na tirahan ng bawat Pamilyang  Pilipino – bahay na hindi lamang pisikal na istraktura, kung hindi bahay na matatawag nating tahanan  kung saan nagmamahalan ang bawat isa. 

Hangad ko ang tagumpay ng proyektong ito.  

Mabuhay po kayo! Maraming salamat sa inyong napakagandang ginawang trabaho upang maging matagumpay itong proyektong ito. Mabuhay ang Disiplina Village! Mabuhay ang Pamilyang Pilipino! Mabuhay po kayong lahat. Magandang umaga po sa inyo. [applause]

— END —

WATCH HERE: Groundbreaking of the Disiplina Village Arkong Bato

LOCATION: Arkong Bato Park, Marcelo H. Del Pilar Street in Valenzuela City