“Ilan ang napaiyak, ilan ang napatawa, ilan ang napasigaw, ilan ang nagurot, ilan ang nanghampas tuwing kinikilig habang nanunuod ng pelikula?” 

Ani Pantawid Pamilyang Pilipino Program National Capital Region (4Ps NCR) Regional Coordinator Leah N. Bautista sa ginanap na 2nd annual search for the Regional Short Film Festival noong Oktubre 6 sa Axiaa Hotel, Quezon City. 

Dagdag pa niya na ang pelikula ay maaaring mag-udyok ng mga saloobin at magtulak ng mga aksyon sa buhay ng mga tao. 

Sa temang "Iisang mithiin para sa Matatag at sa Matagumpay na Pamilyang Pilipino," ang layunin ng short film festival ay ipakita ang transpormasyon ng mga benepisyaryo ng 4Ps habang sila'y umaasenso patungo sa sariling kakayahan at pinahusay na kalagayan. Ang mga maikling pelikulang ito ay magpapalaganap ng mas malalim na pang-unawa ng publiko at magpapahayag ng positibong epekto sa programa sa pamamagitan ng digital at social media channels.

Ang walong short film entries mula sa iba't ibang mga lungsod sa NCR ay sinuri sa simula ng kaganapan, at ito ay nagwakas sa pamamahagi ng mga parangal. Ang mga hurado ay mula sa Office of the President (OP), Philippine Information Agency - NCR (PIA-NCR) at Department of Social Welfare and Development - NCR (DSWD-NCR).

Ayon kay Program Coordinator Bautista, “Behind these short films that we have watched, we wanted to see the lives of our (4Ps) beneficiaries and how it played from the beginning up to today. Films like this have a remarkable capacity to inspire.”

Ang inisyatibong ito ay magbibigay-daan din para sa 4Ps na magbahagi ng mga kuwento ng inspirasyon, determinasyon, pagtitiyaga, at tagumpay habang ipinapakita ang kanilang mga kakayahan sa pag-arte, na nagbibigay sa kanila ng pagkakataon na maging magandang halimbawa sa kanilang komunidad.

Pantawid Pamilyang Pilipino Program 

Pinangungunahan ng DSWD, ang 4Ps ay ang pambansang estratehiya upang puksain ang kahirapan at isang programa ng pamumuhunan sa kapital ng tao na nagbibigay ng kondisyonal na cash transfer sa mga mahihirap na pamilya sa loob ng pitong (7) taon, upang mapabuti ang kanilang kalusugan, nutrisyon, at edukasyon.

Ang 4Ps ay nagbibigay pansin sa mga pangangailangan ng mga marginalized at vulnerable communities sa Pilipinas. Ito’y hindi lamang limitado sa isang tao o isang barangay na tumutulong sa pag-angat ng isang komunidad o isang pamilya, kundi ang pagtulong sa kapwa ay nagsisimula rin mula sa ating sariling pamilya. Nais ng short film festival ipakita ang “shared responsibility,” na sa pitong taon na pananatili ng mga pamilya sa programa ay maisasama sa magandang hinaharap.

PANUORIN

Narito ang tatlong nagwagi sa 4Ps NCR short film festival.

Grand Winner: "KEYK" - HINURNONG PANGARAP AT TAGUMPAY! 

Operations Office: 3 – CALOOCAN CITY

Sa lungsod ng Kalookan, ang pamilya ni Ginang Osmana Tubera ay tatlong beses sinubok ng malupit na apoy sa kanilang tahanan. Ngunit sa bawat sunog, mas lalo silang tumitibay at nagkakaisa. Ang kanilang kwento ay hindi lamang tungkol sa pagbangon mula sa literal na abo, kundi pati na rin sa mga pagbabagong dulot ng mga pagsubok at epekto nito sa kanilang buhay.

1st Runner Up: "Gunita" 

Operations Office: 4 – QUEZON CITY (DISTRICTS 2,3 and 4)

A heartwarming journey towards self-sufficiency. Through tears and laughter, the 4Ps family comes together to reminisce about their past struggles and reflect on how they conquered them.

2nd Runner Up: "Pangarap na Bituin" 

Operations Office: 6 - MALABON CITY, NAVOTAS CITY, AND VALENZUELA CITY

Ang pamilya De Rosario ay mula sa mahirap na pamilya na pilit kumakayod at lumalaban sa hamon ng buhay para sa kanilang mga anak. Isang kahig-isang tuka kung ilalarawan ang kanilang paumuhay. Ang haligi ng tahanan ay isang contruction worker samantalang isang mabuting maybahay si Anabelle.

Tampok sa maigsing pelikula na ito ang kwento ng pighati, pagsusumikap, at tagumpay ng Pamilya Del Rosario katuwang ang Pantawid Pamilyang Pilipino Program na naging saksi sa makulay na paglalakbay ng pamilya sa larong tinatawag na "reyalidad ng buhay. (PIA-NCR)