TAGBILARAN CITY, Bohol, July 21 (PIA) -- Wala pa manawat ang Civil Service Commission Regional Office VII (CSC RO7) sa mga aplikasyon alang sa Fire Officer Examination (FOE), Penology Officer Examination (POE) ug Basic Competency on Local Treasury Examination (BCLTE) nga gitakda karon’g umaabut Oktubre 10, 2021.

Segun pa sa Advisory nga gipagawas sa Regional Director niini nga si Carlos A. Evangelista, kini tungod kay padayon pa ang buhatan nga nagpa-abut sa pag-aprobar sa LGU-Cebu City, kinsa maoy ilang gihangyo nga didto himoon sa ilang lugar ang eksaminasyon, tungod sa nagpadayon nga pandemya sa COVID-19.

Subay niini, gidugang sa CSC 7 nga ila dayon nga ipahibaw pinaagi sa Advisory, sa higayon nga

madawat na nila ang tubag sa LGU Cebu City sa ilang hangyo kabahin sa nasampit nga eksaminasyon.

Nunot niini, tambag sa CSC7, magsunod gayud kanunay sa mga pahibaw sa buhatan.

Nunot usab niini, ang local nga buhatan sa CSC sa Bohol mbutyag nga sa higayon nga maaprobahan sa LGU Cebu City ang hangyo, ug magsugod na og panawat ang CSC Bohol Field Office sa mga aplikasyon, estrikto nila nga ipatuman ang no walk in policy alang sa mga aplikante kon walay aprobado nga appointment sa buhatan, matud ni Liezl Del Rosario, information officer sa buhatan.

Aghat ni Del Rosario, magpahiluna usa og appointment sa CSC Bohol Field Office pinaagi sa ilang facebook page, kay walay makasulod sa buhatan kon walay appointment nga dala.

Dugang sa CSC, kon ugaling aduna pa’y dugang pangutana, aghat niini nga dili gayud magmakuli sa pagpangutana pinaagi sa Teleconsult o subay sa website: csc7.net. (RAHC/PIA7 Bohol)