TAGBILARAN CITY, Bohol, July 22 (PIA) -- Human sa usa ka tuig ug duha ka buwan diha nga nakatala ang lalawigan sa iyang labing una nga molupyo nga namatay tungod sa coronavirus disease (COVID-19), 13 ka lungsod na lang sa Bohol ang mahimong maka-angkon nga wala pay natala nga residente nga nabawi-an sa kinabuhi tungod sa nahisgutang sakit.
Segun sa kasayuran nga gipaambit sa Bohol Inter-Agency Task Force (BIATF), niadtong Hulyo 21 ang mga mosunod nga mga kalungsuran nagpabilin nga walay namatay tungod sa COVID-19 mao nga pwede silang tawagon nga COVID-death free.
Kini mao ang mga kalungsuran sa Alburquerque, Anda, Antequera, Batuan, Bilar, Clarin, Cortes, Dagohoy, Dimiao, Inabanga, President Carlos P. Garcia, Sierra Bullones ug Sikatuna.
Hinuon, dihay mga higayon nga nangalisang usab ang ilang mga residente diha nga may mga nangamatay sa ilang lungsod nga gipanglubong dayon.
Matud sa BIATF, himoan og makuti nga pagtuki kadtong mga nangamatay nga gidudahang natakdan sa COVID 19, ug kadtong nga sayo nga gipalubong nga wala na matan-aw ang resulta sa ilang mga swab results, kini uwahi na nga nasayran nga nagnegatibo diay sa pagtakod sa sakit.
Segun sa Department of Health Memorandum No. 2020-0158, kabahin sa tukma nga pag tratar sa patay nga lawas sa mga pasyente nga gidudahan, gituohan ug kompirmado nga natakdan sa COVID-19, kini naglatid nga ang paglubong ug pagpa-abo sa patay nga lawas kinahanglang mahitabo sulod sa 12 oras human mamatay, subay sa relihiyon ug kultura sa namatay.
Subay niini, kadtong bisan kon gidudahan ra, o mahimong possible nga natakdan, apan wala pay igo nga kamatuoran nga makamatuod sa iyang kahimtang, isipon gihapon nga sama sa nagpositibo sa COVID, mao nga ipalubong dayun.
Sa tibuok Bohol, ang Tagbilaran City, tungod seguro kay dinhi ang labing baga nga populasyon, ug nagdurot-duroy ang mga kabalayan, may labing daghan na nga namatay sa COVID nga miabut na sa 26 ang nakalas.
Ang Ubay and Guindulman, parehas nga may walo na ka residente ang namatay sa COViD samtang ang sa Candijay, 7 na ang namatay sa COVID.
Ang lungsod sa Alicia, Calape, Loon, Maribojoc, Talibon may tag lima na ka residete ang namatay samtang ang Duero, Lila, Loay, ug Tubigon 4 na ang nangamatay.
Ang Dauis ug Jagna, may tulo na ka nangamatay sa COVID samtang ang Baclayon, Buenavista, Carmen, Panglao, Sagbayan ug Sevilla may natala nga tag duha ka mga nangamatay.
Ang Balilihan, Bien Unido, Catigbian, Corella, Danao, Garcia Hernandez, Getafe, Loboc, Mabini, Pilar, San Isidro, San Miguel ug Trinidad mitala ug tagsa ka residente nga namatay sa COVID-19. (RAHC/PIA7 Bohol)
