TAGBILARAN CITY, Bohol, July 23 (PIA) -- Ipakatap ang dugang  nga bakuna sa mga lugar diin namatikdan ang labi ka daghan nga natalang kaso sa Delta variant sa COVID-19.

Miingon si Sec. Carlito Galvez Jr., Chief Implementer of the National Task Force (NTF) Against COVID-19, nga ang programa sa pagpabakuna sa Northern Mindanao (Region 10), National Capital Region (NCR), Western Visayas (Region 6), ug uban pang dapit nga adunay kabalak-an nga mga kaso, ang possible nga mahatagan og prioridad sa bakuna.

Dugang pa niya sa pakig-pulong kauban si President Rodrigo Duterte sa Davao, nga kining nahisgutan nga mga rehiyon gipaubos na sa enhanced community quarantine (ECQ) ug modified enhance community quarantine (MECQ), niadtong Lunes sa gabii.

Sumala sa Presidente, adunay posibleng estrikto nga mga lakang aron malikayan ang local transmission sa Delta variant nga labi ka agresibo ug makamatay.

Dugang usab ni Galvez, taliwala sa mga lugar nga wala’y kabalak-ang kadaghanon sa mga kaso, adunay patas nga pag apod-apod sa bakuna alang sa angay mahatagan niini, subay ug pinauyon usab sa mga programa sa pagpangbakuna sa nasampit nga local government units.

Nakadawat ang NCR og dugang suplay sa bakuna tungod kay daghan kini ug populasyon ug may kakuyaw nga kini dali maigo sa sakit.

Gisundan usab ang nahauna sa Rehiyon 4-A (Calabarzon), Rehiyon 3 (Central Luzon), ug Rehiyon 7 (Central Visayas) nga adunay mahimong madawat nga 1.2 milyon ka dosis sa bakuna. (RAHC/PIA7 Bohol/Analyn Y. Socobos)