TAGBILARAN CITY, BOHOL, July 27 (PIA) -- Nagpahimangno ang Philippine Red Cross (PRC) sa publiko isip usa ka aktibo nga kaalyado sa gobyerno nga mas mag-amping pa kontra sa bag-o ug mas dali makatakod nga Delta variant sa coronavirus disease (COVID-19) karon sa nasud.

Matod ni New PRC Covid-19 response consultant Dr. Teddy Herbosa, importante kaayo sa mga local government units (LGUs) nga mapalapdan ang ilang “Four-Door Policy” sama sa pagpalig-on sa Prevent-Detect-Isolate-Treat-Reintegrate (PDITR) ug pagpalapad sa kapasidad sa mga healthcare system.

Ang Four-Door Policy, upat ka pultahan nga mahimong agi-an sa usa ka tawo nga mosulod sa iyang lugar adtoan.

Kini  nagalangkob sa estriktong border control, aktibong case surveillance lakip na ang pagtesting ug contact tracing, sayo nga paglain ug pag-atiman sa kinsa kadtong mipositibo sa virus ug  ang pagpabakuna.

Matod usab sa kalihim sa usa ka pakigsulti, sa mi-aging duha ka semana, ang mga kaso sa Covid-19, nadala sa mga Pinoy nga gikan sa gawas sa nasud, mao nga wala nato kini masakpi nga nagpositibo na diay sa virus, ug karon nakapanakod na.

Giangkon sa opisyal sa DOH nga lisod na apson karon tungod kay aduna nay mga local transmission hinungdan nga ang bugtong lakang mao ang pagpalig-on sa four door policy lakip na ang agresibo nga mga pagtesting sa mga anaa sa komunidad.

Ang PRC mitabang sa goberno og pagpatuman sa “Four-Door Policy” lakip na niini ang lig-on nga Covid-19 vaccination program.

Nagla-um si Herbosa nga ang tanan nga mga prayoridad nga mga group labi ang mga senior citizens ug kadtong mga tawo nga adunay co-morbidities, mabakunahan na sa labing dali nga panahon.

Dugang pa ni Herbosa, ang sulbad ra niini mao ang pagpabakuna dayon, dili na importate kung unsa nga bakuna tungod kay ang pito ka bakuna, luwas ug epektibo. (RAHC/PIA7 Bohol/John Paul Elicano)