TAGBILARAN CITY, Bohol, July 15 (PIA) -- Gigamit na karon sa Philippine Red Cross (PRC) ang Sputnik V alang sa pagbakuna human makadawat ang ahensya sa 2,700 nga doses sa bakuna gikan sa Inter-Agency Task Force (IATF) sa Manila.

Ang giingon nga mga bakuna gigamit aron sugdan ang pagbakuna sa komunidad nga mga nasulod sa masterlist sa A5 ilabi na niadtong nanimuyo palibot sa Port Area Lab ug mga residente sa Baseco, Manila.

Matod sa hepe sa PRC sa ilang Molecular Laboratory nga si Dr. Paulyn Ubial, target sa PRC nga mabakunahan ang 400 ka mga indibidwal sa sulod sa duha ka semana ug nga unahaon nila ang mga gikan sa A5 priority group o indigent nga populasyon.

Subay usab niini, giingon sa PRC nga ang iskedyul sa pagbakuna sa Sputnik V, sa matag Lunes, Miyerkules, ug Byernes lamang didto sa PRC Port Area, Manila.

Dugang sa PRC, ang mga interesado nga magparehistro, mahimong mokontak sa ilang kontak number nga 1158 labing menos, duha  ka adlaw sa dili pa sila magpatupok sa bakuna. (RAHC/PIA7 Bohol/Ruffa Mae F. Evardo)