TAGBILARAN CITY, Bohol, July 30 (PIA) -- Nakatala ang lungsod sa Loay og 23 nga mga pasyente nga nanga-ayo sa coronavirus disease 2019 (Covid-19)  sulod sa pito ka adlaw.

Sugod sa miaging semana, ang mga nanga-ayo, nagpasaka sa kinatibuk-ang ihap sa mga nanga-ayo didto, ngadto na sa 149, segun sa taho.

Subay sa Loay Covid-19 Case Bulletin nga ilang gipagawas niadtong Miyerkules, Hulyo 28, 2021, nakatala usab sila og dugang 3 ka nagpositibo sa maong virus nga nagdala sa kinatibuk-ang aktibong kaso sa maong lungsod ngadto na sa 6.

Nakatala usab sila ug dugang 1 nga namatay nga nagpasaka sa kinatibuk-ang ihap sa namatay ngadto sa 5.

Nagpahibalo usab ang Lungsod nga temporaryo nga gi-dili gihapon ang pagpaninda sa merkado sa mga dili taga Loay matag Biyernes ug gi-did-an usab ang mga dili importante nga panagtapok.

Gihangyo sa lungsod sa Loay ang ko-operasyon ug pagsabot sa katawhan samtang ilang gipatuman nga mga lagda, ug gihangyo ang tanan nga kanunay musunod gayod sa mga gipamando nga mga health protocols sama sa paglikay sa mga panagtapok ug pagsuot ug face mask ug face shield.

Seryosohon nato ang maong virus labi sa bag-o ug dali makatakod nga Delta variant nga mikuyanap na sa lain-laing mga lugar sa Pilipinas, ug magtinabangay kita pinaagi sa pagpabakuna kay kini lamang ang maong solusyon aron mapa-us-us ang mga aktibong kaso sa nasud, aghat ni Mayor Hilario Ayuban. (RAHC/PIA7 Bohol/John Paul Elicano)