TAGBILARAN CITY, Bohol, Aug. 4 (PIA) -- Gitaho sa Food and Drug Administration (FDA) sa Pilipinas nga gikan sa 8.4 milyones ka doses sa gikatupok nga bakuna sa COVID-19 vaccines, wala makaabut sa usa ka porsyento ang nataho nga mga dili kasagaran nga reaksgon ug walay naospital o namatay sa COVID-19 sa mga nabakunahan sa duha ka semana human sa ikaduhang tupokan.

Sa taho ni FDA General Director General Rolando Enrique Domingo, diha hinuo'y natala nga nasakit pa sa COVID bisag nabakunahan na, bisag nakalapas na sa 14 ka adlaw human sa ikaduhang tupokan, apan kini wala makagrabe ug yano lamang nga naatiman sa mga biktima ug mananambal.

Sa 1.6 milyones nga nakakompleto sa duha ka tupokan sa Sinovac, 33 lamang ang natala nga pagtakod samtang sa 438 mil ka tawo nga natupokan sa AstraZeneca, usa lamang ang natala nga natakdan.

Ang Pfizer usa nga gigamit sa 82,800  ka mga tawo, human sa duha  ka tupokan, usa lamang usab ang natakdan sa COVID.

Walay natala nga taho kabahin sa epekto sa Sputnik V gikan sa 14,000 ka tawo nga mikompleto sa duha  ka dose niini aron mapanalipdan.

Ang kasayuran nga nakuha sa FDA, nahasubay usab sa natala nga performance sa mga bakuna batok sa COVID didto sa nga nasud diin unang gihimo ang mga vaccine trials niini.

Subay sa mga napamatud-an na usab nga mga kasayuran, ang mga hanas sa kahimtang sa kasanihan sa lawas sa tawo mipasabut na usab sa kamahinungdanon sa pagpabakuna isip dugang nga panalipod batok sa COVID.

Gitaho usab sa FDA nga dinhi sa Pilipinas, ang kasagaran nga mga reaksyon sa pagpabakuna mao ang pagtaas sa presyon sa dugo, ngutngot ang gibakunahan, labad sa ulo, pagkalipong, mga katolkatol ug pamantal sa lawas ug mga suliran sa pagginhawa.

Wala usab mahitabo nga may kaso sa paggahi ug paglatok sa dugo ug pagpanghubag sa kasingkasing segun sa unang gitaho sa mga epekto sa bakuna samtang gisuway didto sa gawas sa nasud.

Hangtud karon, subay sa mga edidensya nga nakuha gikan sa gisusi nga mga pasyente nga namatay mitak-op sa kamatuoran nga ang mga seryoso nga reaksyon nga gipasangil sa bakuna, walay relasyon sa bakuna batok sa COVID.

"Sa gihapon, atong gidason nga ang tanan nga bakuna nga nahatagan og emergency use authorization luwas ug epektibo gayud batol sa COVID-19 ug ang ikatabang niini sa lawas , mas bug-at pa kay sa kakuyaw nga ikahatag sa pagpabakuna," saysay ni Director General Domingo.

Importante usab, matud pa sa DOH nga makompleto gayud ang duha ka tupokan kay nakita na nga human sa duha  ka semana gikan sa ikaduhang tupokan, mas daku ang panalipud nga ikahatag niini sa lawas. (RAHC/PIA7 Bohol)