TAGBILARAN CITY, Bohol, Aug. 4 (PIA) -- Niabot na sa Pilipinas ang 3,000,060 doses sa Moderna COVID-19 vaccine nga donasyon sa gobyerno sa Estados Unidos.
Niabot ang mga bakuna sa Villamor Air Base, syudad sa Pasay pasado alas 4:00 sa hapon niadtong Agosto 3.
Gisugat mismo ni Presidente Rodrigo Roa Duterte ang pag-abot sa bakuna kauban ang pipila ka opisyal gikan sa National Task Force (NTF) Against COVID-19, Inter-Agency Task Force for the Management of Emerging Infectious Diseases (IATF-EID), ug Embassy of the United States of America to the Philippines.
Sa mubong mensahe ni Presidente Duterte, iyang gipasalamatan ang Estados Unidos tungod sa pagkamanggihatagon niini sa bakuna batok COVID-19 sa Pilipinas.
"I would like to extend my deepest gratitude to the COVAX Facility for the continuous donation of these vaccines. We look forward to the delivery of even more life-saving vaccines in the country very soon (Buot ko nga ipaabut ang sinsero nga pasalamat sa COVAX Facility sa padayon nga mga donasyon sa bakuna. Amo pa nga gipaabut ang dugang pagpangabut sa mga makaluwas nga bakuna dinhi sa nasud sa sunod nga mga adlaw)," matud pa sa Pangulo.
Matud pa usab niini nga ang mga bakuna nga gi-donate sa Estados Unidos ihatag sa mga kabos nga Pilipino aron mapanalipdan sila batok sa COVID-19.
"Rest assured that everybody will follow that directive (Akong ipasalig nga sundon sa tanan ang kasabutan ug direktiba niini)," pasalig pa ni Duterte.
Ikaduhang shipment na kini sa bakuna gikan sa Amerika ning tuig 2021.
Kahinumdoman nga niadtong buwan sa Hulyo, nakadawat ang Pilipinas og kapin sa tulo ka milyong doses sa Johnson & Johnson COVID-19 vaccines gikan usab sa gobyerno sa Estados Unidos. (ECB/PIA7 Bohol)
