TAGBILARAN CITY, Bohol, July 13 (PIA) -- Ihatod nganhi sa Pilipinas sa Hulyo 19, ang 3.2 milyon ka doses sa Single-shot Janssen Covid-19 nga mga bakuna nga ginama sa Pharmaceutical Firm Johnson & Johnson (J&J), matod sa Department of Health.

Sa Laging Handa briefing, matod ni DOH Undersecretary Myrna Cabotaje, ang Janssen jabs nga gidonar sa Estados Unidos pinaagi sa Covax Facility, istriktong gamiton sa pagbakuna sa priority groups nga A2 (Senior Citizens) ug A3 (Adults with comorbidities).

Dugang usab ni Cabotaje, ang doses sa bakuna sa J&J mahimong kabahin sa 16 milyon nga mga shot sa bakuna nga gilauman nga moabaut karong Hulyo.

Kaniadtong miaging Huwebes, 1,124,100 milyon nga doses sa AstraZeneca jabs nga gidonar sa Japan ang miabut sa Villamor Airbase, samtang sa pagkasunod nga adlaw, 2,028,000 milyon nga dugang nga doses nga gidonar pinaagi sa Covax Facilty ang nahatud na ug madawat na usab sa Pilipinas.

Subay usab niini, kaniadtong Bernes, nakadawat usab ang Pilipinas og 132,200 ka doses sa bakuna sa Sputnik V, nga gilangkuban sa 82,200 nga dosis sa Component I ug 50,000 nga doses sa Component II.

Samtang gisundan sa 37,800 nga doses nga gihimo sa Russia nga bakuna nga Component I ang miabut kaniadtong Sabado sa gabii.

Moabut pa usab sa DOH, karong buwana, ang 938,340 nga doses sa Pfizer jabs, 562,770 ang una nga kargamento diin gikatakda nga moabut sa Hulyo 19 ug sa sunod nga batch adunay 375,570 ang moabut karong Hulyo 26. (RAHC/PIA7 Bohol/Ruffa Mae F. Evardo)