TAGBILARAN CITY, Bohol, Aug. 12 (PIA) -- Nanghinaut ang usa ka mayor sa este nga nahin sa Bohol nga unta modaghan na ang bakuna nga moabut sa ilang lungsod, karon nga mas daghan na ang mga tawo nga gusto magpabakuna.

Didto sa Network Briefing News nga gipadagan sa Presidential Communications Operations Office uban ni Sec. Jose Ruperto Martin Andanar, Agosto 11, gipadayag ni Garcia Hernandez Mayor Tita Virtudazo Baja nga kini na ang mas maayong panahon sa pamakuna.

Giangkon sa mayor nga kaniadto, daghan sa mga katawhan sa iyang lungsod ang mahimong nakabasa o nasultihan sa mga peke ug sayup nga balita, nga nagpaturok na hinuon sa kahadlok sa pagpabakuna sa katawhan. 

Matud sa mga gisawhan nga sayup nga balita, ang bakuna makamatay ug ang matupokan niini mamahimong zombie human sa duha  ka tuig.

Apan sa mga eksperto ug sa mga doctor, ang pagpamakuna maoy usa sa mga labing epektibo nga pangontra sa sakit. 

Dala na usab sa mga gipasabwag nga mga kasayuran ang kabahin sa posibleng dili kalikayan nga pagtakud sa laing tawo, bisan ang tawo nabakunanan na.

Matud sa Food and Drugs Administration sa Pilipinas, wala pay nabakunahan ug nakakompleto sa iyang gikinahanglang duha ka tupokan, ang naospital, na grabe ug namatay ba hinuon, tungod sa bakuna.

Sa nagkadaghan na nga ihap sa mga nangamatay, ang mga katawhan nga nakabantay sa kamatuoran, moagwanta na og sunod sa tag-as nga pila, basta lamang makakuha sa libre nga bakuna, saysay sa mayor didto sa Network Briefing.

Apan, matud pa, tungod sa pagpanic sa mga tawo, nanggawas na hinuon aron maabakunahan sa labing dali nga panahon, dugnag saysay sa mayor.

Apan nakabagat sila og suliran kay gagmay lamang ang bakuna nga miabut, sumbong ni Baja.

Nianang adlawa mismo Agoso 11, may nahidangat nga 5,000 ka mga bakuna, taho ni Department of Tourism Sec. Bernadette Romulo Puyat.

Midangat usab ang 10 mil ka mga bakuna nga Pfizer ug lain nga 5 mil nga Sinovac, Agosto 11.

Gihangyo sa mayor ang ilang pahat unta aron ila na nga mapadayon ang pamakuna. (RAHC/PIA7 Bohol)