TAGBILARAN CITY, Bohol, Aug. 12 (PIA) -- Gipanawagan sa Sangguniang Kabataan Federation (SKF) President sa Garcia Hernandez (GH) ngadto sa mga kabatan-onan nga motabang sa kagamhanan sa pagpakigbugno sa pandemya.
Didto sa Network Briefing News diin gihimong guest si SKF President sa Garcia Hernandez nga si Aldrich Kent Ladesma, iyang gihangyo ang kabataan nga makighiusa sa kagamhanan sa pagpakigbatok sa coronavirus disease (COVID-19).
Matud niya, "mahimo kini sa mga kabatan-onan sa simple nga pagpugong sa pagpakatag sa sayop, gituis ug peke nga mga balita."
Giangkon na sa mga tinugyanan sa kagamhanan nga usa sa ilang suliran sa pagbuntog sa sakit mao ang nagbaha nga mga sayop nga kasayuran, gituyo og tuis ug bakak nga maoy nagtisok og kahadlok, kahingawa ug kabalaka sa mga katawhan.
Tambag sa batan-ong opisyal sa Garcia Hernandez, likayan gayud ang pagpa-ambit o pagpakatag sa nadawat nga sayop, gituis ug bakak nga balita.
Dugang niya, "mas maayo nga subayan una kini o iverify kon tinuod ba, sa dili pa ipasa ngadto sa uban."
Gawas pa, matud niya, kaya sa mga kabatan-onan ang pagsunod sa mga lagda sa minimum health protocols.
Ang minimum public health protocols naglangkob sa pagsul-ob og face mask, face shield, pagbatasan sa pagpanghunaw kanunay, paglikas sa tapoktapok ug pagsocial distance ug ang paglikay sa mga siradong lugar kon may daghang tawo didto.
Kaya ra sa mga kabatan-onan nga moapil sa pagpakig-away pinaagi sa pagsunod kanunay sa minimum public health protocol, dason niya.
Dayon, matud niya, sa pagbukas sa kahigayunan, magpabakuna na dayun.
Ang pagpabakuna maoy usa sa mga labing epektibo nga lakang sa pagpakigbatok sa COVID-19, segun sa mga eksperto sa sakit.
Hinuon, ang kagamhanan may gihan-ay pa nga mga listahan sa mga tawo nga anaa sa mas daku nga risgo nga matakdan sa sakit.
Ang mga kabatan-onan, gawas sa mga naapil sa healthcare frontline workers, mga tawo nga may daan na nga sakit nga gibati, ug mga essential workers, wala pa magsugod sa pagpangbakuna.
Hinuon, sa dili madugay, human makab-ot na sa Bohol ang iyang mga gitarget nga bakunahan subay sa masterlist, sugdan na usab ang pamakuna sa mga kabataan.
Kini usab dungan sa nagkalapad nga hulga sa pagpanakod sa sakit nga COVID-19 nga karon nakit-an nga naa na sa tanan nga mga age groups, lakip na ang mga kabataan.
"Magpabakuna na, aron ato na nga makab-ot ang herd immunity ug mabuntog na nato ang sakit kon maundang na kini sa pagpanakod," matud ni Ladesma. (RAHC/PIA7 Bohol)
