MOGPOG, Marinduque (PIA) -- Umabot sa 500 mangrove propagules ang naitanim sa Barangay Ino, Mogpog Marinduque sa pamamagitan ng ‘Ambagan Para sa Puso ng Kalikasan’ bilang bahagi ng pagdiriwang ng pandaigdigang araw ng mga kabataan.

Ito ay sa pangunguna ni Vice Gov. Romulo Bacorro Jr., at ng Ecological Justice League of Youth Leaders ng Mimaropa Region.

Bukod dito, katuwang din sa makasaysayang eco-advocacy project na ito ang National Youth Commission, Department of Environment and Natural Resources-Marinduque, Ambagan PH, at Rotary Club Marinduque North District 3820.

Kabilang sa mga nakiisa sa gawain ay ang mga kabataan mula simbahan, akademya at komunidad. Maging ang mga fraternities at sororities, motorcycle riders, Philippine Army, Bureau of Fire Protection, REACT Moriones, at ilang mga opisyales ng gobyerno ay nakilahok din.