TAGBILARAN CITY, Bohol, Aug. 23 (PIA) -- Nipagawas og pahayag ang Department of Health (DOH) kalabot sa pahayag sa  usa  ka miyembro sa Vaccine Expert Panel (VEP) nila kalabot sa gidugayon sa epekto sa proteksyon nga ginahatag sa COVID-19 vaccines.

Matud pa sa pahayag sa DOH, “taken out of context” ang nahimong pahayag ni VEP chairperson Nina Gloriani niadtong Agosto 16 diin miingon kini nga isyu pa gihapon sa pagkakaron ang vaccine equity mao nga walay rason nga magdali sa pagkuha og COVID-19 booster shots.

Sukwahi sa mga nikatap nga posts sa social media, gitumbok sa DOH nga wala  hisgoti  ni Gloriani ang gidugayon sa antibodies nga ihatag sa COVID-19 vaccines.

Matud pa nga ang buot ipasabot ni Gloriani sa giingon niini mao nga magsugod og ubos ang antibodies sa lawas sa usa  ka indibidwal nga natupokan og COVID-19 vaccine base na usab sa follow-up gikan sa mga nisalmot sa clinical trials.

Gitumbok usab sa DOH nga tanang COVID-19 vaccines nga gigamit sa pagkakaron ubos sa nagpadayon nga vaccination program base sa Emergency Use Authorization (EUA).

Kini nagpasabot nga kining mga bakuna gihatagan og emergency approval base sa interim results sa nagpadayon nga Phase III clinical trials.

Tungod kay aprobado kini ubos sa EUA, ug ang long-term follow-up studies sa trials niini nagpadayon pa, ang datos sa duration sa immunity subject pa sa mga updates.

Mao nga ang mga participants sa clinical trials gina-monitor og usa hangtod sa duha  ka tuig aron makakuha og kumpletong clinical trial results. (ECB/PIA7 Bohol)