CORTES, Bohol, Aug. 29 (PIA) -- Sa kadaghanon nga 265 na ka mga kamatayon dinhi sa Bohol tungod sa gikaintapan nga coronavirus disease (COVID-19), wala nay rason pa ang mga katawhan nga magpakabuta-bungol sa panawagan sa pagpabakuna.
Kini maoy kinatibuk-ang mensahe nga giluwatan sa mga opisyales sa kasanihan ug public officials sa Bohol sa nagakahadlok nga katikaran.

Subay sa kasayuran gikan sa Bohol Inter Agency Task Force (BIATF) on the Management of Emerging Infectious Disease sa ilang gipaguwa niadtong Agosto 28, 2021, ang ika 265 nga kamatayon mao usab ang ika 64 nga kamatayon sa Bohol sulod lamang sa usa ka buwan.

Kahinumduman nga niadtong Agosto 1, 2021, ang Bohol mitala sa ika 199 ka tawo na ang namatay tungod sa COVID.
28 ka adlaw ang milabay, padayon pa gihapon ang pagpanglagas sa kinabuhi dala sa gibantug nga sakit, diin nakaabut na sa 265 ang namatay.
Sa kinensena nga ihap, namatikdan usab nga halos parehas na ka daghan ang namatay sa una ug ikaduhang kinsena sa buwan.

Miabut sa 34 ang namatay gikan sa Hulyo 27 ngadto sa Agosto 11.

Sukad usab sa Agosto 12 ngadto sa Agosto 26, laing 33 ang namatay.

Sa susamang adlaw, ang labing daghan nga aktibong kaso sa COVID natala diha nga miabut sa 1,650 ang aktibong kaso sa COVID-19 segun sa mga resulta sa Reverse Transcription Polymerase Chain Reaction test results.

Miabut na usab sa 12,717 ka Bol-anon ang kinatibuk-ang kaso sa COVID-19, ug niini ka daghan, 10,802 na usab ang nauli-an na. (RAHC/PIA7 Bohol)