TAGBILARAN CITY, Bohol, Aug. 26 (PIA) -- Gitun-an sa Food and Drugs Administration (FDA) kun hatagan og Emergency Use Authorization (EUA) ang Moderna COVID-19 vaccines aron magamit sa mga nag-edad og 12 hangtod 17 anyos.

Sa usa  ka pahayag, gibutyag ni FDA director general Eric Domingo nga nakasumite na og aplikasyon ang US vaccine developer nga Moderna niadtong Agosto 19.

Matud pa nga gipaabot nga makumpleto sa FDA ang gipahigayong evaluation sa mga clinical data nga gisumite sa Moderna sa mga mosunod nga semana.

Kahinumdoman nga una nang gi-aprobahan sa FDA ang paggamit sa Pfizer-BioNTech vaccine sa may edad 12 hangtod 15 anyos.

Kun maaprobahan ang maong EUA, ikaduha na ang Moderna sa mga bakunang mahimong gamiton sa mga may edad nga 12 hangtod 17 anyos.

Samtang giklaro sa FDA nga bisan makakuha og approval ang Moderna, wala kini nagpasabot nga mahimong kining magamit dayon sa nahisgotang mga edad tungod kay mas prayoridad sa gobyerno nga mabakunahan ang mga naa sa priority list. (ECB/PIA7 Bohol)