TAGBILARAN CITY, Bohol, Oct. 21 (PIA) -- Hangtud Oktubre 31 na lamang ang pagduso sa mga online request for refund sa mga examinees sa nakanselar nga Civil Service Examinations Pen and Paper Test (CSE-PPT) nga mahitabo unta niadtong Marso 15, 2021.

Kini maoy pahibaw nga giluwatan ni Civil Service Commission Bohol Field Officer ug Director Alice May Parcon dili pa lamang dugay.

Human sa deadline sa pagfile sa refund nga sa Octubre 31, dili na modawat pa ang CSC sa request for refund, kay magsugod na dayun usab ang payout sa mga refunds taman sa Nobyembre 30, dugang ni Dr. Parcon.

Sa usa ka advisory, gipahibaw sa Bohol CSC Field Officer nga ang mga requests for refund himoon lamang sa online ug dili dawaton sa CSC ang uban nga paagi sa requests, gawas sa online facility.

Ang online request, mahimo sa pag-accomplish sa gituyo paghimo nga google form nga mahimong makita sa CSC7 official facebook account: https://www.facebook.com/cscro7/ o sa CSC website: csc7.net.

Ang google form nga makit-an sa link, fill-upan sa makausa lamang.

Human sa pag-accomplish sa form, i-attach ang mga dokumento nga gikinahanglan didto sa google form: scanned nga kopya sa Request for Refund Form (RRF) ug scanned nga kopya sa valid ID card nga may tin-aw nga hulagway, may nakabutang nga adlaw nga natawhan ug may pirma.

Dugang sa CSC, ang refund nga P500.00 sa matag narehistro nga examinee ipaagi sa bisan asa nga sanga sa Palawan Pawnshop sa tibuok nasud.

Ang pawnshop na mismo maoy mopahibaw pinaagi sa text message ngadto sa numero nga gibutang sa refund form, apil na ang petsa sa pagkuha ug ang transaction code niini.

San nangayo sa refund kinahanglan usab nga mo-accomplish ug mopirma sa “Palawan Express Pera Padala Received Money Form” (PEPPRMF) isip resibo sa refund nga ipadala sa CSC-7.

Basta makuha lang sa panahon nga gitagal, walay bayaran ang mokuha sa refund, samtang kadtong mapakyas sa pagkuha sa refund sa gitaganang adlaw nga naa sa text message, mahimo kining makanselar ug magpaabut na usab kanus-a kini makuha og balik.

Aron makuha ang refund, kinahanglang makapakita sa original copy sa usa ka ID nga giluwatan sa kagamhanan, o student ID kon menor de edad ang mokuha.

Ang nahisgutang ID kinahanglang magmatuod nga nakaenrol ang bata ug may hulagway, adlaw nga natawhan ig pirma sa hepes a tunghaan. Gawas pa, kinahanglan usab ipakita ang transaction Code nga gipadala sa Palawan Pawnshop pinaagi sa text.

Alang sa dugang kasayuran, tawag sa (038) 5017046. (RAHC/PIA7 Bohol)