TAGBILARAN CITY, Bohol, Oct. 27 (PIA) -- Mahimong manubag ang mga opisyal sa mga local government units sa masayang nga mga COVID-19 vaccines, matud pa ni DILG Undersecretary Jonathan Malaya.

Matud pa sa Kalihim nga posibleng mag-atubang sa neglect of duty ug misconduct ang mga lokal nga opisyal, depende sa sirkumstansya ug resulta sa imbestigasyon.

Gidugang pa ni Malaya nga gi-monitor usab nila ang mga LGUs pinaagi sa vaccine operations reporting system.

Gawas pa niini, giingong may nakabutang usab nga mga field officer sa tanang city ug municipal halls sa tibuok nasod aron i-monitor ang performance sa mga LGUs.

Apan sigun pa ni Malaya nga sa pagkakaron, wala pa’y nakita ang ilang buhatan nga mga LGUs nga nagpabaya sa pagbakuna.

Gibutyag sa DILG undersecretary nga ilaha nang gidugangan ang suplay sa vaccines sa mga lalawigan ug gisakaan usab nila ang daily jab target sa tanang LGUs.

Kahinumdomang sa milabay nga cabinet meeting, gipasidan-an ni DILG Kalihim Eduardo Año ang mga LGU nga mahimong mapasakaan og kaso kun nagpabaya ug may nasayang nga mga bakuna sa COVID-19. (ECB/PIA7 Bohol)