TAGBILARAN CITY, Bohol, Oct. 30 (PIA) -- Pormal nang gilusad ang implementasyon sa Universal Health Care (UHC) Program sa lalawigan sa Bohol nga gilaumang maghatag og tubag sa taas nga balayranan sa pagpatambal sa mga Bol-anon ilabi na sa mga kabus.
Kini human nilagda og kasabotan ang Department of Health (DOH) tali sa Philippine Health Insurance Corporation (PHIC) ug sa Kagamhanang Probinsyal sa Bohol alang sa implementasyon sa UHC niadtong Oktubre 29, 2021 didto sa Bohol Provincial Capitol, ning syudad sa Tagbilaran.
Sa UHC, ang mga Bol-anon gigarantiyahan sa patas nga akses sa dekalidad ug baratong mga produkto sa panglawas ug mga serbisyo ug proteksyon batok sa risgong pinansyal. Ang UHC motabang sa pagseguro nga tanang Bol-anon himsog, protektado gikan sa risgo ug mga peligro ug adunay akses sa barato, dekalidad ug naa dayon nga mga serbisyo sa panglawas nga haum sa ilang panginahanglan.
Atol sa programa nga gipahaum sa kalihokan didto sa Kapitolyo, gipahayag ni Gobernador Arthur Yap nga ang maong programa daku kaayo ug tabang ilabi na sa mga kabus kay dili na kinahanglan pang mamaligya sa ilang mga abot ug hayopan aron magamit sa ilang pagpatambal.
Pinaagi sa maong programa, ang tanang katawhan miyembro man o dili sa PhilHealth mahimong makapahimos sa dekalidad nga mga serbisyo pinaagi sa referral system gikan sa ilang nagkadaiyang mga lugar nga maoy mag-monitor sa matag pamilya pinaagi sa preventive, promotive ug curative nga aspeto sa kahimsog sa panglawas.
Gilantaw ni Yap nga kung anaa lang ang hiniusang datos sa impormasyon sa katawhan, adunay diagnostic system ang barangay ug ubanan sa gipalambo nga mga health facilities, sayon na unya ang pagpatuman sa mga inobasyon aron maminusan ang mga palas-anon sa mga kabus sa higayon nga aduna kini balatian.
Si DOH-7 Regional Director Jaime Bernadas sa iyang bahin mitataw nga mahimong mahisakop sa Universal Health Care Program ang mga serbisyo sa pribadong mga tambalanan sa higayon nga kini gikinahanglan ug maoy na assigned nga Health Care Facility sa usa ka pasyente.
Ang paglusad sa UHC sa lalawigan sa Bohol gipangunahan nilang DOH-7 Regional Director Bernadas ug Margarita Maria Pestillos sa Philhealth. Gitambongan usab kini nilang Provincial Health Officer Dr. Cesar Tomas Lopez, Bohol First District Congressman Edgar Chatto, mga kauban sa hunta probinsyal ug mga mayor sa lungsod sa Bohol.
Niadtong Febrero 2019, hingpit nang nahimong balaod ang Universal Health Care Bill human gilagdaan ni Presidente Rodrigo Duterte ang maong balaodnon nga nagbukas sa halapad nga reporma sa health care sector sa Pilipinas. (ECB/PIA7 Bohol)
