TAGBILARAN CITY, Bohol, Nov. 9 (PIA) -- Gipahibalo sa Bangko Sentral ng Pilipinas (BSP) sa publiko nga dili tinuod ang mga nanggawas nga mga bag-ong disenyo sa salaping papel.
Ang BSP nipagawas og advisory kalabot niini isip tubag sa usa ka 500-peso commemorative banknote nga unang napatik sa usa ka satirical news website nga gipakatap sa social media.
Gipahinumdoman sa BSP ang publiko nga magbinantayon ug gi-awhag ang bisan kinsa nga nakahibalo sa naggamit sa pekeng salaping papel nga ipahibalo kini sa kapolisan o sa Payments and Currency Investigation Group sa BSP pinaagi sa email address: currencyinvestigation@bsp.gov.ph.
Ubos sa Republic Act No. 10951, ang mga mameke og salapi sa Pilipinas mahimong pahamtangan og silot nga pagkabilanggo og dili mo ubos sa 12 ka tuig ug 1 ka adlaw ug multa nga dili molapas sa duha ka milyong piso.
Gi-awhag usab sa BSP ang publiko nga magpabiling updated kalabot sa mga lehitimong banknotes nga ipagawas sa BSP.
Ang BSP regular nga nagpahigayon og mga public information campaigns aron pag-edukar sa publiko sa disenyo, security features, ug sakto nga paggunit sa Philippine currency lakip na ang may mga kalabotan sa balaod, polisiya ug programa. (ECB/PIA7 Bohol)
