TAGBILARAN CITY, Bohol, Nov. 12 (PIA) -- Ipatuman na sa tibuok nasod ang alert level system (ALS) alang sa coronavirus disease (COVID-19) response.

Kini human gilagdaan ni Presidente Rodrigo Roa Duterte ang Executive Order No. 151 niadtong Nobyembre 11.

Klaro nga nakalatid sa EO nga obligasyon sa estado nga panalipdan ug ipatuman ang katungod sa maayong panglawas sa katawhan. Kini ang hinungdan nganong kinahanglang magpatuman na ang estado og state of public health emergency sa tibuok nasod sa panahon nga adunay pandemya sa COVID-19.

Kini tungod kay grabeng naapektuhan ang kinabuhi sa mga indibidwal ug mga pamilya sa tibuok kalibotan ilabi na ang sektor sa mga kabos sa COVID-19.

Magpatuman ang gobyerno og mga tukmang lakang ug mga patakaran sama sa mga community quarantine alang sa kaluwasan sa kadaghanan.

Nakalatid pa gihapon sa EO nga ang pinakabag-ong patakaran mao ang alert level system nga base sa mga datos, naghatag karon og kadasig og balik sa ekonomiya  dungan sa padayon nga paghatag og proteksyon sa panglawas sa mga tawo.

Tungod niini, ipatuman na sa tibuok nasod ang alert level system ubos sa upat ka yugto.

Phase 1 ang pagpaubos na karon sa alert level system sa NCR, Region 3, 4A, 6, 7, 10 ug 11.

Phase 2 ang sa Region 1, 8 ug 12 nga nagsugod karong adlawa, Nobyembre 12.

Phase 3 ang Region 2, 5, ug 9 nga ipatuman sa Nobyembre 17.

Samtang phase 4 ang CAR, Region 4B, 13, ug Bangsamoro Autonomous Region in Muslim Mindanao nga ipatuman sa Nobyembre 22, 2021. (ECB/PIA7 Bohol)