TAGBILARAN CITY, Bohol, Nov. 16 (PIA) -- Mahimo nang makadawat ang mga fully vaccinated health workers sa ilang booster shot sugod Nobyembre 17.
Kini ang gipahibalo sa Department of Health (DOH) sa publiko human maaprubahan sa Food and Drug Administration (FDA) ang emergency use authorization niini alang sa pipila ka vaccine brands.
“All fully-vaccinated healthcare workers may avail of booster doses starting 17 November 2021 (Wednesday),” matud pa sa gipagawas nga pahayag sa DOH, niadtong Lunes sa gabii.
Dugang pa sa anunsyo sa DOH, bisan unsang brand sa bakuna nga unang natupok sa health workers mahimo na silang hatagan og booster shot gamit ang Moderna, Pfizer, ug Sinovac.
Gitakdang ipagawas ang mga sumbanan alang niini karong adlawa pinaagi sa National Vaccine Operations Center.
Una nang naaprobahan sa DOH ang paghatag og “booster” ug dugang COVID-19 vaccine doses sa Pilipinas karong 2021 ug 2022 isip dugang proteksyon samtang nagkaubos ang ka-epektibo sa naunang mga shots.
Ang booster doses ihatag sa mga indibidwal nga nakakumpleto na og duha ka COVID-19 vaccines ( o usa ka dose alang sa mga single-shot brands).
Ang ikatulo o dugang dose gigahin alang sa mga tawo nga kulang ang proteksyong nakuha sa primary series tungod kay wala kaayo nakahimo og immunity ang lawas – kasagaran tungod sa mga adunay sakit o immunocompromised sila. (ECB/PIA7 Bohol)
