CEBU CITY, Cebu, Nov. 17 (PIA) -- Sa kasaulogan sa "Drug Abuse and Prevention Control (DAPC) Week" karong tuiga, ang Philippine Drug Enforcement Agency Central Visayas (PDEA-7) miawhag sa katawhan nga mag binantayon sa mga mikatap nga "fake news" bahin sa ilegal nga droga ug ang epekto niini sa katawhan.
Sa pag selebrar sa 2021 DAPC nga naay temang "Share Facts on Drugs, Save Lives", kini gipakita unsa ka kritikal ang pagkuha og saktong impormasyon bahin niining nagpadayung kampanya batok ilegal nga droga.
Ang ahensya mihimangno sa tanan ilabi na sa mga kabatan-onan nga daghan kaayo'g avenue kung diin makuha ang mga naglain-laing klase sa impormasyon og gipaambit ang importansya sa pagkuha og paghatag og sakto og tinuod nga mga impormasyon ngadto sa uban alang sa kaayuhan og kaluwasan sa kadaghanan.
Isip usab pagtima-an sa maong kalihokan ang PDEA mopahigayon og mga lectures ngadto sa mga eskwelan og kabarangayan para ihatud ang sakto og tinudanay nga impormasyon nga makatabang sa katawhan paglikay sa ilegal nga droga.
Si Leia Alcantara, information officer III sa PDEA-7, mipadayag niadtong Miyerkules, Nov. 17 sa programang "KASAYURAN", nga kinahanglan magpakabana ug magbinantayon ang katawhan ug didto lang moduol sa mga lehitimong tinubdan sa balita gikan sa media ug sa mga nag-unang ahensya sa gobyerno para makalikay nga mabiktima sa fake news or disinformation bahin sa ilegal nga droga.
Giawhag usab ni Alcantara ang kabatan-onan pinaagi sa Sangguinang Kabataan (SK) nga mohimo og mga kalihokan sama sa film showing pagpakita sa mga dautang epekto sa paggamit og ilegal nga droga ug uban pang importanteng impormasyon mga makatabang sa mga tawo pagbatok sa ilegal nga droga.
"Pwede gyud ang SK mag initiate og mga activities, such as film showing, pwede ra sila mangayo sa PDEA para sa mga materials and resources nga ilang gamiton sa ilang pagahiumon nga mga activities dili siya kinahanglan nga naay go signal from PDEA, as long as ang intention nila is to share the rught information pwede ra gyud sila mag start og ilaha sa ilang tag-tagsang barangay anytime," matod ni Alcantara.
Sa pag lig-on sa kampanya batok sa ilegal nga droga pinaagi sa mga saktong impormasyon, ang ahensya nanghinaot nga mas modaghan pa ang mga barangay sa Central Visayas ang mamahimong drug cleared kay kini maoy sukdanan kung nagpamalampuson ba ang nasudnong kampanya sa gobyerno batok sa ilegal nga droga.
Sa uwahing tala sa PDEA, aduna nay 1,100 ka mga barangay sa Central Visayas ang gi deklarar nang drug cleared nga mga lugar o 37 porsiyento sa kinatibuk-ang 3,003 nga barangay sa maong rehiyon. (RGC/PIA7)
