TAGBILARAN CITY, Bohol, Nov. 26 (PIA) -- Paminaw ba nimo nag-inusara ka o nanginahanglan og kaestorya?
Mahimong mopahimos sa tanyag sa Department of Social Welfare and Development (DSWD) nga online mental ug psychological assistance karong may pandemya.
Kini ang WiSUPPORT, nga tuyong mahatagan og psychosocial support ang mga indibidwal o pamilyang nakasinati og kahadlok, kabalaka ug uban pang kaguol tungod sa pandemya.
Gamiton niini ang mga online platform sama sa email, web portal, telephone, ug mobile application.
Katambayayong niini sa DSWD ang Department of Health (DOH) ug National Center for Mental Health.
Atol sa tigom sa mga miyembro ug opisyal sa Association of United Development Information Officers (AUDIO) Bohol niadtong Nobyembre 25, miingon si WiSupport Focal Person Charmine V. Hintapa nga tuyo niining programan nga maserbisyuhan ang mga overseas Filipino workers (OFWs) nga nakasinati og kaguol, mga kabata-an nga nanginahanglan sa espesyal nga proteksyon sa hamtong, mga kababayen-an, mga person with disability, family heads, ug uban pang indibidwal sa mga pamilya nga nakasinati og kagul-anan.
Matud pa ni Hintapa nga may mga gi-assign nga makighinabi sa mga nanginahanglan og tabang.
Mahimong motawag sa WiSUPPORT sa mga numero 0999-849-9733 (Smart) ug 0945-712-3718 (Globe) o e-text lamang ang DSWD(space)WiSUPPORT(space) Name/Sex/Age/Region/Mensahe sa numero 0918-912-2813.
Abli ang ilang linya gikan alas 8:00 sa buntag taman alas 5:00 sa hapon apan walay labot sa mga holidays.
Gipasalig ni Hintapa nga ang tanang impormasyon nga ipadangat, i-konsiderar nga pribado ug kompidensyal. (ECB/PIA7 Bohol)
