CORTES, Bohol, Nov. 28 (PIA) -- Kadtong aduna nay napasugdan nga negosyo nga may gihuptan ng mga local nga permits unya nangandoy nga molambo pa kini pinaagi sa tabang sa kagamhanan, suwayi og tambong sa online orientation sa Small Enterprise Technology Upgrading Program (SET-UP).
Ang online orientation mahitabo karong Disyembre 1, 2021 sa may alas 10 sa buntag ug mahimong apilan pinaagi sa FacebookLive ug Zoom.
Hinuon, gikinahanglan nga marehistro una, aron makaapil, matud pa ni Vina Antopina ang director sa DOST Bohol Provincial Science and Technology Center (DOST Bohol PSTC).
Programa nga nagsukad sa Department of Science and Technology (DOST) ang SET-UP usa ka nasudnong pamaagi aron aghaton ug tabangan ang mga micro, small, ug medium enterprises (MSMEs) sa pagsagop sa mga binag-ong teknolohiya aron ipaugmad ug pamaayohon ang mga produkto, serbisyo, pagpadagan sa pagdumala ug pagpadaghan sa abut ug magpakig-ambas sa mga hawon na sa nasampit nga mga Negosyo.
Matud sa DOST, ang mga Negosyo nga ilang katabangan mao ang negosyo sa pagkaon (lakip na ang water refilling), mga kagamitan ug kabtangan sa balay (furniture), mga panggasa, gamit sa balay, mga panghalad (decors), marine ug aquatic resources, pag-amoma sa tanaman ug mga lagutmon.
Katabangan usab kadtong nagtrabaho sa mga metals, engineering ug fabrication, produkto sa lawas, mga serbisyo niini, mga tambal, information communication technology, electronics (software ug Applications Development, artificial intelligence, pagsibya sa radio ug telebisyon.
Niining nga mga pamuhunan, mahimo sa DOST ang pagtabang sa pag-upgrade sa mga kahamitan ug kahimanan sa produksyon, pagtumbok sa mga fgikinahanglan nga teknolohiya aron makaugmad, pagpamaayo sa mga produkto nga gibaligya ug gitanyag sa publiko.
Makatabang usab ang DOST sa pag-ugmad sa value chain, paghatag og mga konsultasyon, serbisyo pang laboratory, magpanindot sa pustanan ug pa-gmad sa ngalan ug label sa produkto, ug sa pageksperimento pinaagi sa pagtanyag og pundo alang sa Rent To Own nga mga kasabutan.
Kining tanan, mahibaw-an didto sa orientation sa SET-UP.
Hinuon, kadtong mga interesado nga moapil, kinahanglan nga magparehistro og una aron makaapil.
Alang sa pagrehistro, gikinahanglan nga mo-fill up sa files sa google documents nga ang link, pwede nga mapangayo ug makuha gikan sa DOST Bohol PSTC nga facebook page.
Aron marehistro, pwede usab dinhi nga link: https://forms.gle/DHJRkQUunt83cA7o8. (RAHC/PIA7 Bohol)