CEBU CITY, Cebu, March 3 (PIA) -- Sa pagselebrar sa Fire Prevention Month, ang Bureau of Fire Protection (BFP) miawhag sa tanan nga kanunay nga magbinantayon aron malikayan ang insidente sa sunog ug ilang gitumbok nga ang pagpakabana sa matag higayon mao ang usa sa dakong kinahanglan alang sa paglikay sa sunog og uban pang disgrasya.
Adunay tema nga “Sa pag-iwas sa sunog di ka nag iisa” karong tuiga nga selebrasyon sa Fire Prevention Month, gi sentro sa ahensya ang ilang programa pag hatag og kasayuran nga anaay kalambigitan sa Fire Safety Awareness ngadto sa katawhan.
Kabahin niini, ang BFP mogamit sa gitawag nga community approach kung diin ilang adtuon ang mga panimalay aron mahatagan ang matag pamilya og saktong edukasyon unsaon nga malikayan ang sunog.
Ang BFP mopahigayon og daghang mga fire drills, fire safety awareness seminars and trainings, ug motabang sa mga barangay pagpahimutang sa ilang community fire protection plan.
Samtang modugang usab sa ilang mga fire fighting equipment ang kabomberohan nga dakong tabang sa sayon nga pag responde sa insidente sa sunog.
Sa programang “KASAYURAN” niadtong Marso 2, ang City Fire Director sa Mandaue City Fire Office nga si Supt. Noel Nelson Ababon mibatbat sa pakig alayon nga gibuhat sa BFP ngadto sa mga lokal nga kagamhanan sa pagpalambo sa mga programa paglikay sa sunog.
“Nakig partner ta sa lokal nga kagamhanan ilabi na gyud nga naay programa ang atong lokal nga kagamhanan og fire tanks og mga fire extinguisher, usa pud sa ilang gi tan aw ang pag taod og mga dry pipes,” si Ababon miingon.
“Usa sad sa atong gihimu sa katung mga areas nga dili masulod sa mga fire trucks naa tay gihimu nga firehose mapping aron atong makita asa pwede ma taud ang mga firehose sa atong mga bombero,” dugang niya.
Sa Mandaue City, adunay 85 ka mga insidente sa sunog miadtong tuig 2020 samtang anaa sa 62 miadtong tuig 2021.
Samtang sa Cebu City, namatikdan ang pagtaas sa insidente sa sunog sa miaging tulo ka tuig kung diin miadtong 2019 adunay natala nga 55 ka nga fire incidents, 53 miadtong 2020, ug misaka ngadto sa 137 ang insidente sa sunog miadtong tuig 2021.
Sigon sa Mandaue og Cebu City Fire Office, ang mga nag-unang hinungdan niini may kalambigitan sa electrical connections ug overheated appliances.
Mipahimangno usab ang BFP sa mga business establishments sa hugot nga pagtuman sa fire code og mo renew sa ilang Fire Prevention Compliance Certificate aron kini masiguro nga luwas ug ilang malikayan ang sunog.
Sa pagtuman sa BFP sa ilang mga programa, si Ababon adunay awhag sa matag Mandauehanon og Sugbuanon.
“Hinaot unta magtinabangay tang tanan para malikayan natu ang sunog ug uban pang mga disgrasya. Kay sa Fire Prevention man gyud you are saving lives, you are saving property,” pagpahinapos sa hepe sa Mandaue City Fire Office. (RGC/PIA7)
