CEBU CITY, Cebu, March 17 (PIA) -- Taliwala sa mga hagit sa pandemya, ang Philippine Drug Enforcement Agency Region 7 (PDEA-7) nagpadayun sa ilang subsob nga operasyon dinhi sa Central Visayas pagbatok sa dugay nang problema sa ilegal nga droga.

Isip usa sa nag-unang adbokasiya ni Presidente Rodrigo Duterte, ang pagpukan sa ilegal nga droga dinhi sa nasod maoy usa sa mga labing lig-on nga kampanya nga padayung gibuhat sa kasamtangang administrasyon.

Ang PDEA-7 mipahugot sa ilang kampanya pagpaubos sa demand sa ilegal nga droga sa rehiyon 7 kung diin kini ang nakita nga maoy labing epektibong solusyon pag sulbad sa maong problema.

Ang ahensya nakig alayon sa mga nagkalain-laing local government units (LGUs) ug national government agencies (NGAs) sama sa Department of Health (DOH) sa pag pa hamtang sa gitawag nga “Community Based Drug Rehabilitation Program” kung diin ang tumong mao ang hatagan og saktong treatment and rehabilitation services ang mga tawo nga nigamit og illegal nga droga, samtang nakig-uban pud ang PDEA sa Department of Labor and Employment (DOLE) alang sa pagpatuman sa “Drug Free Workplace Program” ngadto sa mga pribadong establisyemento ug opisina.

Sa programang “KASAYURAN” niadtong Marso 16, si Leia Alcantara, information officer III sa PDEA-7, mipadayag sa mga programa nga gibuhat sa PDEA ilabi na sa aspeto sa rehabilitasyon isip usa sa mga solusyon pagpukan sa ilegal nga droga.

“Naa tay mga programa nga gi implement karon para ma bridge ang gap, matagaan og appropriate intervention ang katung mga individuals nga anaay mga rason nga mobaligya o mogamit og illegal nga droga," si Alcantara miingon.

“Ang PDEA nagahatag og equal importance sa demand and supply reduction program kung diin samtang nagpadayun ang atong mga anti-illegal drug operations ug illegal drug clearing programs sa matag barangay, hugot pud ang atong pagpatuman sa mga community and facility based treatment and rehabilitation programs," dugang ni Alcantara.

Sa pagkakaron, gikan sa 3,003 ka mga barangay dinhi sa Central Visayas, aduna nay gideklarar ang PDEA nga 1,084 ka mga “drug cleared barangays” samtang anaa usab sa 116 ka mga barangay ang gikonsiderar na nga “drug free” o wala nay presensya sa mga drug personalities.

Luyo niini, giangkon sa PDEA nga anaa pa gihapon ang lapad nga transakyon sa illegal nga droga ilabi na sa Metro Cebu kung diin anaa ang pundok sa katawhan.

Matod usab sa ahensya, anaa sa 60% ang drug affectation rate kung diin aduna pay 1,803 ka mga drug affected barangays dinhi sa Central Visayas.

Apan mapasalamaton gihapon ang PDEA-7 ngadto sa mga LGUs ug uban pang mga ahensya sa gobyerno nga padayung misuporta kanila sa pagpalig-on sa kampanya batok ilegal nga droga, aron nga kini makakab-ot og tinud-anay nga kalamposan. (RGC/PIA7)