CEBU CITY, Cebu, April 10 (PIA) -- Ang kapulisan sa probinsya sa Sugbu sa pagpangulo sa Cebu Police Provincial Office (CPPO) mihan-ay na asa ilang hugot nga pagpangandam alang sa hapsay ug malinawon nga kasaulogan sa umaabot nga Semana Santa.

Matod sa CPPO nga padayun ang pagpalambo sa ilang security plan kini aron mahapsay ang tanang preparasyon alang sa nahisgutang okasyon.

Si PCol. Engelbert Soriano, provincial director sa CPPO, mipadayag nga andam na ang tibuok pwersa sa kapulisan sa probinsya sa pag-abag aron ang pagselebrar sa Semana Santa mahimung luwas og mahinungdanon.

“The CPPO treat the situation as back to normal so expect a large of influx of people coming to Cebu province and as far as security plan is concern we are ready, as of this very moment my deputy provincial director for operations is now conducting a conference with all the offices to double check all the preparations for the upcoming Holy Week,” si Soriano miingon.

Ang CPPO mopakatap og dugang nga mga pólice personnel ngadto sa mga pantalán ug mga terminal aron sa pagsiguro sa seguridad sa mga pasahero nga mobyahe ug alang pud sa pagbantay sa saktong pag-implementar sa mga health protocols niining mga pasilidad.

Gipahingusgan pud sa CPPO ang ilang mga police unit sa nagkalain-laing istasyon pagsiguro nga kini kanunay nga andam sa pagbantay sa seguridad og pag tubag sa higayon nga naay magkinahanglan og tabang gikan sa kapulisan.

Samtang, nakig-alayon usab sila ngadto sa Philippine Coast Guard (PCG) ug sa dumalaan sa mga bus terminals alang sa pagsiguro nga hapsay ang tanang biyahe sa nagkadaiyang mga pantalan ug terminal sa tibuok probinsya.

Sa pagsaulog sa Semana Santa, ang CPPO mipahimangno usab sa tanang Sugbuanon nga mag-amping ug magbinantayon sa tanang higayon ilabi na karon nga gilauman ang pag-abot sa daghang mga tawo.

Gidasig sa kapulisan ang tanan nga dili magduha-duha og sumbong kung aduna may mamatikdan nga kadudahan nga panghitabo o insidente nga maghatag og hulga sa seguridad sa publiko.

“We are back to normal, we have survived COVID-19, and we have survived 'Odette' and so many other crises in the past, and let’s not waste this opportunity by doing stupid things in the community. The police cannot do it alone, we expect full cooperation from the Sugbuanons who are peace loving people and your police will always be here to assist you," matod sa hepe sa CPPO. (RGC/PIA7)