TAGBILARAN CITY, Bohol, Dec. 12 (PIA) -- Gipahinumdoman sa Civil Service Commission (CSC) ang mga trabahante sa gobyerno nga likayan ang pagpangayo og regalo subay sa holiday season.
Ang CSC nagkanayon nga ang Code of Conduct and Ethical Standards for Public Officials and Employees (RA 6713) naglatid nga ang mga opisyal ug empleyado sa publiko dili mag-solicit o modawat, direkta o dili direkta, sa bisan unsang regalo, gratuity, pabor, kalingawan, loan o bisan unsa nga kwarta nga kantidad gikan sa bisan kinsang tawo sa dagan sa ilang opisyal nga mga katungdanan o may kalabotan sa bisan unsang operasyon nga gi-regulate sa, o bisan unsang transaksyon nga mahimong maapektuhan sa mga gimbuhaton sa ilang opisina.
Ang Section 3 sa Anti-Graft and Corrupt Practices Act (RA 3109) nagdili usab sa pagpangayo ug pagdawat sa mga gasa, matud sa CSC.
Kun ang usa ka kliyente o aplikante, supplier o kontraktor, o bisan kinsa nga indibidwal, grupo, o kompanya nga adunay mga transaksyon o makigtransaksyon sa ahensya maghatag regalo o token, si CSC Chairperson Karlo Nograles miingon nga “just politely decline and explain that you are only doing your job.”
Matud pa ni Nograles nga ang balaod nagdili usab sa pagpangayo og sponsorship o advertisement, sama sa raffle prizes alang sa Pasko o year-end parties.
Gidugang usab niini nga ang mga pangulo sa mga ahensya sa gobyerno mahimong mag-isyu og internal nga “no gift policy” aron paggiya sa ilang mga opisyal ug empleyado kay kini may kalabotan sa ilang tagsa-tagsa ka mandato ug trabaho.
Matud pa sa CSC nga ang kaangayan o pagkadili angay sa gasa matino pinaagi sa bili, kadugo o relasyon tali sa tighatag ug tigdawat, ug motibasyon.
Ang pagdawat sa mga gasa gikan sa mga sakop sa pamilya nga gihatag nga walay pagpaabot sa pinansyal nga benepisyo; kadtong gikan sa mga tawo nga walay regular, pending, o gipaabot nga mga transaksyon sa buhatan sa gobyerno diin ang tigdawat nahisakop; kadtong gikan sa pribadong mga organisasyon nga gihatag uban sa humanitarian ug altruistic nga katuyoan; ug kadtong gidonar sa usa ka entidad sa gobyerno ngadto sa lain gawasnon sa pagdili.
Gipahinumdoman usab ni Nograles ang mga buhatan sa gobyerno, ilabina kadtong naghatag ug frontline services, sa pagsiguro sa walay hunong nga paghatag sa serbisyo taliwala sa pagpahigayon sa year-end festivities.
Ang hepe sa CSC nag-awhag sa mga pangulo sa mga ahensya sa pagsagop sa tukma nga mga iskedyul sa pagtrabaho aron masiguro nga ang tanan nga mga kliyente nga naa sa sulod sa ilang lugar sa wala pa matapos ang opisyal nga oras sa pagtrabaho maatiman. (ecb/PIA7-Bohol)
