TAGBILARAN CITY, Bohol, Feb. 1 (PIA) -- Ang kagamhanang probinsyal sa Bohol nga usa sa mga pilot province alang sa Universal Health Care (UHC) naglaum nga hingpit nang mapatuman ang programa sa sunod tuig aron mahatagan og mas lapad ug accessible nga libreng healthcare ang publiko.
Kini human gipahigayon ang Provincial Local Health Board Meeting nga gipangulohan ni Gobernador Erico Aristotle Aumentado niadtong Enero 30 diin gihisgotan ang kahimtang sa UHC ug pagtudlo sa mga opisyal sa mahinungdanong ahensya ug organisasyon nga maoy manguna sa pagpatuman sa programa.
Atol sa maong meeting, gisubay usab ang mga kakuwangan sa paghatag og de kalidad nga serbisyong panglawas, aron kini mapangitaan og solusyon.
Sa maong meeting gi-presentar sa mga kadagkuan sa Provincial Health Office (PHO) sa gobernador asa na dapit ang pagpangandam sa lalawigan sa UHC kay ang Bohol usa man sa early integration sites sa tibuok Pilipinas.
Matud pa ni Assistant Provincial Health Officer Dr. Cesar Tomas Lopez, maayo ni siya nga programa tungod kay inclusive ning maong programa nga maghatag og tabang sa mga kabus.
Gibutyag niini nga ang PHO ug uban pang ahensya nagsugod na sa pagparehistro sa mga residente ug gidestino sila sa mga health center ug mga ospital nga motagana sa ilang mga panginahanglanon ug magtanyag sa mga serbisyo nga libre.
Giingong kadtong mga rehistrado mamahimong benepisyaryo sa PhilHealth “Konsulta Package” diin ubos niining programa, ang mga indibidwal makapahimos sa mga checkup, konsultasyon ug bisan tambal gikan sa ilang gi-assign nga healthcare facility o practitioner sama sa mga doktor.
Isip kabahin sa UHC, ang gobyerno nagtinguha usab sa pag-establisar og “Super Health Centers” sa matag munisipyo nga mapuno sa mga ekipo ug maghatag og ambulatory care. Kini nga mga pasilidad aduna usab mga botika nga maghatag og libreng mga tambal.
Ang mga galastuhan alang sa pagpatuman sa programa bayran pinaagi sa “Special Health Fund” nga gimugna pinaagi sa UHC nga balaod ug ubos sa kontrol sa Provincial Health Board. (ECB/PIA7 Bohol)
