TAGBILARAN CITY, Bohol, Feb. 3 (PIA) -- Ang kagamhanang probinsiyal sa Bohol nakadawat og P100 milyones gikan sa Office of the President isip hinabang pinansyal sa upat ka lungsod sa lalawigan nga naapektuhan pag-ayo sa Super Typhoon Odette. 

Ang P100 milyones nga budget gikan sa pondo sa Office of the President ubos sa Socio-Civic Projects Fund (SCPF).

Niadtong Huwebes, Pebrero 2, gilagdaan ang Memorandum of Agreement (MOA) uban sa Office of the President, nga maoy pasiuna sa pag-download sa pondo.

Gitambongan kini nila Gobernador Erico Aristotle Aumentado, Bise Gobernador Victor Balite, provincial administrator Asteria Caberte, ug mga mayor Janet Garcia sa lungsod sa Talibon, Fernando Estavilla sa Pres. Carlos P. Garcia, Raymond Jala sa Loboc ug Constantino Reyes sa lungsod sa Ubay.

Gibutyag ni Aumentado nga tag P25 milyones nga financial cash assistance ang ihatag matag usa sa mga lungsod sa Loboc, Talibon, Pres. Carlos P. Garcia ug Ubay.

Ang maong financial grant gamiton sa paghatag og proyekto sa pabalay sa lungsod sa Loboc ug Talibon samtang evacuation centers sa lungsod sa Pres. Carlos P. Garcia ug Ubay.

Si Gobernador Aumentado nagpasalamat sa Office of the President sa hinabang pinansyal nga gihatag sa lalawigan sa Bohol.

“Mapasalamaton kita sa ayuda gikan sa kagamhanang nasyonal, sa suporta sa Provincial Shelter Cluster Core Team ug sa tanang nagbudlay ani kay tungod sa pagtinabangay nahimong reyalidad ang atong gihandum nga tabang. Ang kanhi administrasyon kabahin usab niini,” matud pa ni Aumentado. (ECB/PIA7 Bohol)