TAGBILARAN CITY, Bohol, Feb. 6 (PIA) -- Agi og suporta alang sa mobility sa Field Validation Teams nga nagpahigayon sa pag-andam alang sa Support to Parcelazation of Lands for Individual Titling (SPLIT), gidawat sa Department of Agrarian Reform (DAR) Bohol ang upat ka bag-ong Honda Xr nga mga motorsiklo.
Proyekto nga gipundohan sa World Bank ug sa kagamhanan sa Pilipinas, ang SPLIT nagtumong nga pun-an pa ang ka produktibo sa mga mag-uuma nga una na nga nahatagan og yuta nga matikad pinaagi sa Comprehensive Agrarian Reform Program (CARP).
Communal nga Certificate of Land Ownership Awards (CCLOA) ang kamatuoran nga gihatag sa DAR alang sa mga mag-uuma nga benepisaryo sa proyekto sa CARP.
Apan, segun sa mga ulahing pagtuon, menos sa produksyon ang mga mag-uuma nga walay tataw nga kasayuran kon hain mang dapita ang nasulod sa ilang CCLOA, kon kinsa man ang mobugwal sa particular nga lugar ug unsay kasegurohan sa pagpanag-iya nga ang yuta nakapangalan man sa kapunungan ug dili sa usag-usa.
Nagtuo and Provincial Agrarian Reform Office sa Tagbilaran nga mapun-an ang ka produktibo sa mga mag-uuma sa Bohol sa higayon nga sila na mismo nga personal nga mapanag-iya ang titulo sa yuta nga gitanyag kanila CARP.
Pinaagi sa SPLIT Project, gilantaw nga mahatagan na og husay sa nagkabaliktos nga sitwasyon, mapatin-aw ang mga teknikal nga suliran ug magarantiya na ang seguridad sa mag-uuma nga mahatagan sa iyang personal nga luna gikan sa tibuok nga CCLOA.
Apan, gikinahanglan nga mahipno pa una ang mga teknikal nga gulgot sa dili pa kini mapasipak ngadto sa individual titles.
Alang niini, may Project Management Office sa DAR nga maoy magtutok sa pagsubay sa mga nahatag nga yuta aron mapaandam kini alang sa SPLIT.
Mga Field Validation teams nga gilangkoban sa mga upat ka sakop ang karon naglibot sa mga Agrarian Reform Communities sa Bohol aron tibawason ang 2,100 ka ektaryas nga yuta nga iproseso alang sa pagsipak sa individual titles, matud pa ni Dr Ronald Pumatong, Provincial agrarian Reform Officer sa Bohol.
Apan bisan sa suliran sa mobility diin kasagaran sa team, migamit sa ilang mga personal nga sakyanan aron lamang makuha ang target nga 2,100 ka ektarya niining tuiga, mikabat na sa 2,704 ka ektarya ang ilang nasubay.
Sa pagpangabut sa upat ka motorsiklo, gilauman nga mas modaghan pa ang sipakonon nga maabut sa Field Validation Teams sa DAR.
Sa kasayuran nga nakuha sa DAR Bohol, gimanduan dayon ni Dr Pumatong si PCAO Lumirane H. Calamba ug ang General Services Unit Head sa DAR nga si Leonida Hingpit Bonghanoy uban sa upat ka drivers sa pagkuha dayun niining mga motorsiklo nga gamiton alang sa proyekto sa Bohol.
Matud sa DAR, ang upat ka motor kabahin sa 30 ka motorsiklo nga gipahat sa DAR VII alang sa SPLIT Project nga gitugyan usab ni Director Romeo Reyes sa Administrative Service sa DAR Central Office ngadto lang DAR7 Director Leomides Villareal. (RAHC/PIA7 Bohol uban ni MLDB)
