TAGBILARAN CITY, Bohol, Jan. 10 (PIA) -- Dili na mahadlok pa nga makadawat og peke nga kwarta o maproblema sa sensilyo ang mga mamaligyaay sa Tagbilaran City Central market, kini human pormal na nga gilusad dinhi ang “PalengQRPh Plus,” Enero 10, 2023 dinhi sa Tagbilaran City. 

Ang PalengQRPh, usa  ka digital mobile application nga maghatag og pasilidad sa usa  ka mamalitay nga makapalit sa produkto, serbisyo og moplete sa mga sakyanang pangpubliko, nga dili na motunol pa og cash.

Sistema nga gi-ugmad sa Bangko Sentral ng Pilipinas (BSP) ug gisuportahan sa Department of Interior and Local Government (DILG), ang PalengQRPhPlus gisagop sa Tagbilaran pinaagi sa usa  ka ordinansa nga gipanday sa City Sanggunian, pinangulohan ni Bise Mayor Adam Relson Jala. 

Kahinumduman nga sa pagkapili ni City Mayor Jane Yap isip puli sa iyang bana nga kanhi mayor, iyang gihimo nga usa sa labing unang mga Executive Orders ang mandu nga himoon ang mga transaksyones sa City Hall ug sa Tagbilaran nga digital.

Kini subay usab sa damgo sa babayeng mayor nga himoon ang Tagbilaran nga smart city, ug mag-una sa Bohol sa pag-innovate gamit ang teknolohiya, segun pa sa Mayor sa iyang pamulong didto sa paglusad.

Sa paglusad sa PalengQRPh Plus sa Tagbilaran, matod ni BSP Deputy Governor for Regional Operations and Advocacy Sector ug kanhi kalihim sa Tourism nga si Bernadette Romulo-Puyat, nga ang Tagbilaran maoy labing labing una nga syudad ug local government unit nga nakapasugod sa digital cashless transactions alang sa merkado ug panakyanan dinhi sa Central Visayas, ug mismong labing unang LGU nga gipahiluna sa BSP alang sa cashless transactions alang sa 2023.

Gipasabut ni Romulo-Puyat nga ang PalengQRPh sa ubang lugar, alang lamang sa mga merchants apan sa Tagbilaran City, dala na niini ang digital cashless payments sa panakyanan sa pipila ka mga tricycles nga nahi-apil niini, hinungdan sa PalengQRPh Plus.

Ang PalengQRPH plus dinhi, tungod ka naapil na ang Tricycle Operators and Drivers Association (TODA), dayag ni Romulo-Puyat.

Gani, sa pagkakaron, ang Tagbilaran City, usa sa lima ka mga LGUs nga nag-una sa tibuok nasud sa pagsagop sa PalengQRPh, sunod sa Baguio City, Davao City, Cavite City ug Mandaluyong City, saysay ni Deputy Governor Puyat.

Sa Tagbilaran City Central market sa Dao, ang usa  ka mamalitay nga adunay mobile wallet, pwede nga mobayad sa iyang pinalit pinaagi sa cashless nga paagi.

Sa pag-apil sa programa, ang mamaligyaay, mag-bukas og iyang kaugalingon nga electronic wallet usab, ug may kaugalingong QR Code nga ihatag aron sayun lamang ang binayranay.

Kinahanglan lamang usab sa us aka mamalitay nga iyang iscan ang QR Code nga anaa sa item nga iyang paliton, ug sa proseso, mopaingon ang iyang transaksyon sa account sa namaligya.

Pwede na niya kini nga bayaran pinaagi sa online: tumbok nga wala nay kinahanglan pang sensilyo, ug kay walay kwarta nga itunol, dili na kuyaw sa tindera nga makadawat og peke nga kwarta, gawas pa nga makalikay sa paggunit sa kwarta nga posibleng puno na sa kagaw. (RAHC/PIA7 Bohol)