TAGBILARAN CITY, Bohol, Feb. 7 (PIA) -- Human katugoti sa Sanguniang Panlungsod, milagda si City Mayor Jane Cajes-Yap sausa ka Memornadum of Understanding (MOU) tali sa United States Agency for International Development (USAID) sa pagpatuman sa mas bukas nga kolaborasyon sa tanang sector sa katilingban aron madungog ang ilang tingog sa tanang hukom pangkaugmaran sa syudad.

Kahinumduman nga niadto pa nga 2015, minglagda na usab ang syudad sa Tagbilaran pinaagi sa kanhi Mayor nga si John Geesnel Yap sa USAID sa pagpatuman sa mga proyekto sa USAID.

Niadtong 2021, sa paglusad sa Cities for Enhanced Governance and Engagements (CHANGE) napasugdan ang pagpahimutang sa mas tinambayayongan nga pagdumala sa pangagamhanan alang sa mas napalig-on nga demokratikong pagdumala.

Kini sa mas lawom nga tumong alang sa mas mapalapad nga pagpangalagad, mas dayag ug mas daling pagpanubag sa mga nangatungdanan.

Sa CHANGE Project, gipa-asdang ang paggahum sa mga sector aron kahimo  sila sa mas aktibong pagpanginlabut aron pamaayohon pa ang pagpatuman sa inambitan nga gahum sa kagamhanan, aron mapagawas ang mas katuhuan, mas epektibo ug mas nagamhan nga mga molupyo sulod sa usa  ka lugar.

Ug sanglit ang CHANGE nagbarug sa pilosopiya nga ang hiniusang buhat ug mas lig-on nga pagtambayayongay tali sa local nga kagamhanan ug  sa mga molupyo nga nanimuyo niini, kini maoy tinubdan sa mas dayag ug giambitang nga pangalagad.

Niini, sulod sa unom ka tuig sa CHANGE Project, gitutokan niini ang pagpalig-on sa inambitan nga pagdumala, pagpadali sa pagpadangat sa serbisyo, pagkasihag ug pagpatubag sa mga nangatungdanan ug paggahum sa mga molupyo sa pagpanginlabut ilabi na sa pagtuki sa mga proseso nga gisunod sa kagamhanan, pinaagi sa gisabutan usab nga mga pamaagi.

Dinhi, nalagdaan ang MOU alang sa pagpalapad pa kapasidad sa mga Civil Society Organizations ug mga representante niini pagpasulod sa ilang mga hunahuna sa mga desisyon nga himoon sa kagamhanan.

Niini, nagtuo ang mga tig-organisa nga  ang paglagda sa MOU magpugos sa syudad sa pagpamati sa sugyot sa mga sector alang sa kausaban, paglambigit niini sa mga desisyon, ug sa pagpatubag sa kagamhanan sa posible nga mga desisyon nga wala magtimbang sa hunahuna ug panahum sa mga sector.

Sa MOU, misaad ang USAID sa tabang teknikal ug pinansyal samtang ang syudad usab makigtimbang sa USAID sa pagpahiluna sa mga sistema nga maghatag og gahum sa mga sector.

Niini, nalipay si Mayette Gasatan, ang pangulo sa Tagbilaran City People’s Council sa bag-ong katikaran kay kini maghatag sa mas daghang maayong hunahuna isip dugang input aron may kapasikaran ang mga desisyon sa kagamhanan.

Milagda sa MOU si City Mayor Jane Yap ug si Ethan Takahashi, sa USAID.

Si  Takahashi maoy contracting officer sa Regional Office of Acquisition and Assistance sa USAID.

Mingsaksi usab sa paglagdaay ang kinatibuk-ang konseho sa syudad, mga department heads, mga civil society representatives, sakop sa media ug mga barangay chairmen nga mipakitag suporta sa proyekyo. (RAHC/PIA7 Bohol)